Ku va mu 2019 uru rutonde rw’abaraperi bakize ku Isi ruyobowe na Jay Z ubarirwa umutungo wa miliyari 1.5$ , P Diddy utunze miliyari 1$, Dr Dre na miliyoni 800$, Kanye West ubu yisanga ku mwanya wa kane na Miliyoni 400$ z’Amadorali y’Amerika.

Puff Daddy umwaka ushize yabarirwaga umutungo wa miliyoni 900$, kuri uyu wa 28 Ukwakira 2022 yujuje miliyali y’amadorali y’Amerika nk’uko byemezwa na Zack O’Malley Greenburg, umwanditsi mukuru wa Forbes Magazine.

P Diddy w’imyaka 52 asanzwe afite inzu ifasha abahanzi ya ‘Bad Boy Records’ yashinze mu 1993 bivugwa ko yinjije miliyoni 35$ z’Amadorali y’Amerika uyu mwaka.

Ikigo cy’itangazamakuru ry’imyidagaduro cya Revolt yashinze mu 2013 na DeLeón Tequila byose hamwe byinjije miliyoni 90$ muri uyu mwaka.

Kanye West we akomeje guhananuka

Umuraperi Kanye West wahinduye amazina akitwa Ye amaze iminsi myinshi yihariye impapuro z’imbere mu bitangazamakuru bitandukanye hirya no hino ku Isi, avugwaho inkuru zitari nziza k’ubushabitsi bwe bwari bwaratumye yinjira ku rutonde rw’abanyamuziki batunze miliyari y’amadorali ya Amerika.

Ibihombo yagize muri uyu mwaka birimo gutakaza amasezerano ahenze yari afitanye n’ibigo bitandukanye birimo Adidas, Balenciaga, Gap n’ibindi.

Amafaranga Kanye West w’imyaka 45 yabarirwaga na Forbes Magazine si ayo yari atunze kuri konti za banki ni agaciro k’ibikorwa bye yari afite, ni ukuvuga umutungo we muri rusange.

Ku wa 27 Ukwakira 2022 mu butumwa yise ko ari ubw’urukundo yanditse kuri Instagram, Kanye West yemeje ko yahombye miliyali 2$.

Yagize ati “Nabuze miliyali 2 z’Amadorali y’Amerika, gusa ndacyariho, ubu ni ubutumwa bw’urukundo , ndacyabakunda , Imana iracyabakunda , amafaranga siyo agena uwo ndiwe , abantu nibo babigena.”

Imyitwariye ya Kanye West itavugwaho rumwe ishirwa mu majwi nk’intandaro ya mbere ituma akomeza guhura n’ibi bibazo byose.

Ubwo uyu murapiri yari yitabiriye ibiro by’imideli bya ‘Paris Fashion Week’ byasojwe ku wa 04 Ukwakira 2022 ,yagaragaye yambaye imyambaro iriho amagambo ya ‘White Lives Matter’ biteza impagarara ku mbuga nkoranyambaga nyuma avuga ko ibya ‘Black Lives Matter’ ari ubuteka mutwe.

Nyuma y’aho uyu muraperi w’imyaka 43, yumvikanye avuga ko George Floyd atishwe n’ivi ry’umupolisi ahubwo yishwe n’ibiyobwabwenge bituma umuryango we n’abandi bamurakarira.

Si ibyo gusa Kanye West yongeye kumvikana avuga amagambo atarashimishije Abanyamerika n’Abayahudi bari hirya ni hino ku Isi.

Kubera ibyo tugarutseho haruguru byabaye mu mezi abiri gusa ashize bishingirwaho n’ibigo byinshi bivuga ko bitakomeza kwihanganira gukorana n’uyu muhanzi.

Muri Nzeri Kanye West yavuze ko yatandukanye n’uruganda rw’imideli rwa GAP asesa amasezerano yari afite agaciro ka miliyoni 970$ z’Amadorali y’Amerika.

Ubu uruganda rwa Gap rwatangaje ko rugiye gukura ku isoko imyambaro ya Yeezy Gap mu maduka yose asaga 500 ari hirya no hino ku Isi.

Nyuma y’aho nabwo yahise avuga ko agiye gushoza intambara kuri Adidas nubwo yamutanze igasesa amasezerano y’imyaka 10 bari bafitanye yasinywe mu 2016.

Kanye na Adidas barifitanye amasezerano yo gukora inkweto za Yeezy Sneakers yari afite agaciro ka miliyali 1.7$ z’Amadorali ya Amerika, bituma yinjira ku rutonde rw’abatunze miliyali y’Amadorarali y’Amerika.

Kuri ubu uruganda rwa Adidas rwemeye guhomba miliyoni 246$, rusesa amasezerano rwagiranye n’uyu muraperi kuva mu 2013.

Ikinyamakuru Forbes kivuga ko uyu muhanzi adafite Adidas abarirwa umutungo wa miliyoni 400$.

P.Diddy yinjiye mu bahanzi batunze miliyari y’amadolari, Kanye West (Ye) we akomeza kugana aharindimuka