Uyu muraperi wageze i Dubai mu rukerera rwo ku wa 20 Nyakanga 2024, yabwiye IGIHE ko uretse umunaniro w’urugendo mu by’ukuri nta kindi kibazo afite ku buryo yiteguye gutanga ibyishimo.

Ati “Ntakubeshye, uretse umunaniro w’urugendo ubundi meze neza, nishimiye kugera muri uyu Mujyi ku nshuro ya mbere, banyakiriye neza kandi nanjye meze neza.”

Uyu muraperi wahagurutse i Kigali mu gitondo cyo kuri uyu wa 19 Nyakanga 2024, yageze i Dubai mu rukerera rwo ku wa 20 Nyakanga 2024 umunsi n’ubundi azataramiraho.

P Fla yaherukaga mu kibuga cy’indege mu 2007 ubwo yari agaruwe mu Rwanda avuye muri Norvège kubera ibyaha byo gucuruza ibiyobyabwenge yari yarahakoreye ubwo yari yarimukiyeyo.

P Fla wari waragiye i Burayi kurangirizayo amashuri yisumbuye ndetse akahatangirira kaminuza, akaba n’umuhanga mu gukina Basketball cyane ko yakiniye ikipe ya Oslo Kings yaje kugira ikibazo cy’imyitwarire nyuma yo kwisanga mu kigare cy’urubyiruko rwamuraruye biba ngombwa ko acyurwa mu Rwanda ku gahato.

Uretse indege yamucyuye ku gahato yaherukagamo mu 2007, P Fla yongeye gufata rutemikirere mu gitondo cyo kuri uyu wa 19 Nyakanga 2024 yerekeza i Dubai aho agiye gutaramira.

P Fla ategerejwe gutaramira i Dubai

Ubwo P Fla yari ageze ku kibuga cy'indege cy'i Dubai

Akigera ku kibuga cy'indege, P Fla yakiriwe n'abanyarwanda bamutumiye