Riderman yahishuye uko nyina yamubujije kwishora mu matiku y’abahanzi

Riderman wari umutumirwa muri Gen-Z Comedy Show mu gice bise "Meet Me Tonight" yatanze umurongo ku ngingo zitandukanye yabajijwe zijyanye n’inzangano zivugwa hagati y’abahanzi ndetse atanga inama ku bakiri bato.

Uyu muraperi avuga ko yigeze kubura akazi kari kumuha amafaranga menshi bitewe n’umuntu wamuvuze nabi kandi avuga ibitari ukuri.

Ati “Ubu rero hari intambara y’abahanzi badusebya, hari amasezerano y’akazi nabuze kubera umuntu wansebeje, umuntu iyo akugendaho biba bigoye kuko mba ncunga ko uwo muntu atongera kubikora. Kuba twatandukanye nk’inshuti ntibivuze ko tuba abanzi.”

Uko umubyeyi we yamubaye hafi ubwo yari atangiye kwishora mu ndirimbo zuzuyemo ihangana hagati ye n’abahanzi bagenzi be (beef).

Ati “Mama yansabye kureka beef (indirimbo zirimo ihangana n’urwango) yarambwiye ati ni ibi koko ugiyemo? Nanjye nabisohotsemo kuko sibyo nari ngamije.”

Uyu muraperi watangiye umuziki iwabo, yagiriye inama abakiri bato.

Ati “Icya mbere ni ukwigirira icyizere. Ugomba kumva inzozi zawe utitaye ku bandi. Nta muntu wakumva wowe utiyumvise. Nta muntu uzakwizera nutiyizera. Nta muntu ushobora kumva inzozi zawe nk’uko uzumva.”

Uyu muraperi nanone agaruka ku bashyira imbere amafaranga, aho yavuze ko bakwiye kuzirikana impamvu batangiye umuziki.

“Si byiza gushyira imbere amafaranga kuko atinda kuza, n’ubwo abantu batagushyigikira wowe komeza uzirikane impamvu watangiye.”

Uyu muraperi umaze imyaka 17 muri muzika yakebuye abahanzi bacyizerera mu miziki y’ihangana n’amatiku (Beef) bakora bashaka gukomeza kuvugwa muri showbiz

Ubwo Riderman yari atangiye kuririmba abakunzi b'umuziki bahagurutse baririmbana na we nyuma yo kubaha impanuro zikomeye

Riderman ni we wari umutumirwa muri Gen-Z Comedy ibitaramo by'urwenya biyoborwa na Fally Merci

Riderman agaruka ku bashyira imbere amafaranga yavuze ko bakwiriye kuzirikana impamvu yatumye batangira ibyo bakora

Riderman (Uri hagati ya Siti True Karigombe na Twahirwa Aimable ) yavuze ko hari amasezerano y’akazi yabuze bitewe n’umuntu wamuvuze nabi amusebya

Gatsinzi Emery [Riderman] avuga ko umubyeyi we ariwe wamukebuye igihe yari atangiye kwishora mu miziki yuzuyemo ihangana n'inzangano hagati y'abahanzi bizwi nka beef

Amafoto : Herve Kwizera