Ubuzima bwo mu mutwe ni ingingo idakunzwe kuvugwaho byeruye mu muryango bitewe no kutayisobanukirwa, aho benshi bagifata uburwayi bwo mu mutwe nk'amarozi cyangwa bamwe bakabyita ubusazi.

Umunyabugeni Kakizi Jemima yemera ko ubugeni bwatanga umusanzu mu kwigisha no guhugura abantu ku ngingo runaka, bagahindura imyumvire.

Ni muri urwo rwego yateguye imurikabihangano yise "Gendana Nanjye" rivuga ku buzima bwo mutwe, aho yahurije hamwe abanyabugeni 10 barimo Uwera Odile, Teta Chel, Natacha Muziramakenga, Christel Arras, Ines Ineza, Rutamu U. Fabiola, Kayibanda Alice, Ingride Mukundente, Poupoute na Birara Myriam.

Aba bose bahuriye mu cyiciro cya mbere cy'iri murikabihangano cyabaye ku wa 7 Mutarama kugeza ku wa 28 Mutarama 2023 ku Kacyiru kuri L'Espace, ku nkunga ya Goethe Institut na L’Espace.

Mu rwego rwo kugeza iri murika mu bindi bice by'igihugu, icyiciro cya kabiri cy’iyi gahunda cyakomereje mu karere ka Rutsiro mu ntara y'Iburengerazuba, ku wa 21 Mata 2023 ku nkunga ya Ambasade y'u Bufaransa mu Rwanda.

Uyu munyabugeni n’abamuherekeje basuye abangavu bo muri Berwa – Kinunu, umushinga wa Kiliziya Gatolika ufasha abangavu babyariye iwabo, aho bigishwa umwuga wo kudoda, bagahabwa imashini zo kudoda mu rwego rwo kubafasha kwiteza imbere.

Nyuma yo kubamurikira ibigangano bitandukanye by’ubegeni, aba bakobwa baganirijwe ku ngaruka z'inda ziterwa abangavu ku buzima bwabo bwo mu mutwe.

Iki kiganiro cyayobowe na Kakizi Jemima, gitangwa n'umunyamategeko Mugabo Sharif Yusuf, Elisée Uzabonimana impuguke ku buzima bw'imyororokere n'umuhanga mu mitekerereze ndetse na Anna Mapendo impuguke mu bijyanye n’ubuzima bwo mu mutwe.

Abangavu bahawe umwanya wo kubaza ibibazo no gutanga ibitekerezo, bagaragaza ko imbogamizi bagihura na zo ari ukutamenya no no gusobanukirwa amategeko abarengera.

Ikindi ni ukudahabwa indezo n'abagabo babasambanyije bakabatera inda no kuba abana babo batanditswe mu irangamirere.

Aba bangavu bahawe udutabo "Agaciro Kanjye" twigisha ku buzima bw'imyorokerere, twatanzwe n'umushinga wa Imbuto Foundation.

Amafoto : Tripus Photography