Rwanda Day yagereranyijwe n’iserukiramuco Nyarwanda (Video)

Yanditswe na Twarabanye Venuste
Kuya 5 Ukwakira 2019 saa 07:03
Yasuwe :
0 0

Umuyobozi wa Kwetu Film Institute, Eric Kabera, witabiriye Rwanda Day iri kubera ku nshuro ya 10 i Bonn mu Budage, yavuze ko nk’abantu bakora muri sinema bafata uyu munsi nk’iserukiramuco ‘Festival’ Nyarwanda rikomeye ku Isi.

‘Rwanda Day’ ni umunsi umaze kumenyerwa nk’uhuza Abanyarwanda bo mu gihugu, ababa mu mahanga n’inshuti z’u Rwanda, bagahuzwa n’intego imwe yo kuganira ku cyarushaho guteza imbere igihugu cyabo.

Kabera yavuze ko uyu munsi berekana uko u Rwanda ruhagaze binyuze mu mashusho, ndetse bagahura n’abandi banyabugeni b’abanyarwanda baba hirya no hino ku Isi.

Ati “Icya mbere na mbere navuga ko Rwanda Day ari nka Festival [iserukiramuco], ikomeye cyane ihuza abanyarwanda benshi bava mu Rwanda no hanze, nkanjye rero uri muri sinema, ni ibintu byerekana mu by’ukuri aho u Rwanda rugeze, aho ruvuye n’ibyo rwakoze nka sinema”.

Akomeza avuga ko we nk’umuntu ucuruza amashusho, abikoresha mu kwerekana amateka y’u Rwanda, akerekana aho rwavuye n’aho rujya.

Kimwe n’abandi banyarwanda kandi ngo ni ishema kuri we ukaba n’umwanya wo kwishimana n’abandi banyarwanda.

Kabera ati "Bifite akamaro nko kuba ndi ahangaha ni ishema kuri njyewe, ni ishema ku gihugu kandi ni ibintu bisanzwe kuza kugira ngo umuntu arebe ibyishimo abanyarwanda bafite n’ukuntu bitabiriye iki gikorwa njyewe na byita nka Festival [iserukiramuco] ya mbere yo mu Rwanda."

Kwetu Film ifatwa nk’uruganda rwa sinema mu Rwanda, ruhugura abatunganya amashusho, kandi rugatoza abakinnyi bazo.

Kuva mu 2010, Rwanda Day yasize amateka akomeye mu mpande zose z’Isi, yaba muri Leta Zunze Ubumwe za Amerika no mu Burayi aho imaze kubera.

Ni ibihe biba bidasanzwe byatangiye mu Ukuboza 2010 nubwo uyu munsi utari wakiswe Rwanda Day, aho Perezida Kagame yahaye impanuro Abanyarwanda basaga 2400 baba mu Bubiligi; abashishikariza ko bakwiye ‘kwiyizera aho gutegereza ak’i muhana’.

Ni umunsi ukoranyiriza hamwe Abanyarwanda mu mahanga wahawe inyito ya Rwanda Day ku nshuro ya mbere muri Kanama 2011 i Chicago muri Leta ya Illinois muri Amerika, ukoranya abasaga 4000.

Kuva mu 2011, Rwanda Day imaze kubera i Chicago, Boston na Atlanta muri Leta Zunze Ubumwe za Amerika, i Paris mu Bufaransa, i Toronto muri Canada, i Londres mu Bwongereza, i Amsterdam mu Buholandi, i San Francisco muri Leta Zunze Ubumwe za Amerika (Rwanda Cultural Day), i Ghent mu Bubiligi, none uyu mwaka yerekeje mu Mujyi wa Bonn mu Burengerazuba bw’u Budage.

Kuri izi nshuro zose, abitabira uyu munsi w’imbonekarimwe bagira amahirwe yo guhabwa impanuro zitandukanye na Perezida Paul Kagame.

Umuyobozi wa Kwetu Film Institute, Eric Kabera, yitabiriye Rwanda Day iri kubera ku nshuro ya 10 i Bonn mu Budage
Kabera yamuritse iterambere rimaze kugerwaho mu ruganda rwa Sinema mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza