Mu bahanzi basohoye indirimbo nshya muri iki cyumweru turangije harimo Muyango, Davis D, Yampano, Juda Muzik , Amag The Black , Ice Nova, n’abandi.

‘Intwari z’u Rwanda’ – Muyango

Ku munsi Abanyarwanda n’ishuti z’u Rwanda bizihiza umunsi w’intwari umuhanzi Muyango yamuritse indirimbo irata Intwari z’u Rwanda.

Iyi ndirimbo yakozwe na Pastor P mu buryo bw’amajwi mu gihe amashusho yayo yakozwe n’abarimo Harris Image, Santo na Legit Creatives

‘Warahabaye’ - Patient Bizimana ft Nelson Mucyo

Umuhanzi w’indirimbo zo kuramya no guhimbaza Imana, Patient Bizimana, muri iki cyumweru ubwo yizihizaga isabukuru y’amavuko yamurikiye abakunzi be amashusho y’indirimbo nshya yise ‘Warahabaye’.

Iyi ndirimbo yahuriyemo na Nelson Mucyo yayimuritse mu rwego rwo kwizihiza byihariye isabukuru ye y’amavuko ashima Imana yabanye na we mu buzima bwe bwa buri munsi.

Amajwi y’iyi ndirimbo yakozwe na Sano Panga, mu gihe amashusho yayo yakozwe na Jacob Legacy ukorera mu Ishusho Ltd.

‘Turi kumwe’- YB Foundation

Umuryago wa YB Foundation washinzwe na Yvan Buravan muri iki cyumweru wamuritse igihangano gishya gihumuriza abarwaye n’ababuze ababo bishwe na kanseri ari nayo yahitanye uyu muhanzi wari urwaye kanseri y’urwagashya.

Iyi ndirimbo inagaruka ku bukangurambaga bwo kurwanya kanseri yumvikanamo ijwi ry’umuraperi Mazimpaka Prime , Umutoni Raissa (mushiki wa Yvan Buravan), na Kagire Edmund.

Ni indirimbo yasohotse ku munsi mpuzamahanga wo kurwanya indwara kanseri, uyu ukaba umusanzu w’iyi fondasiyo yitiriwe uyu muhanzi.

‘Truth or dare’ (remix) - Davis D na Big Fizzo

Nyuma yo gutaramira i Burundi, Davis D yasubiyeyo afite gahunda yo gusoza umushinga w’indirimbo yakoranye na Big Fizzo umwe mu bahanzi bafite amateka muri iki gihugu.

Aba bahanzi babanje gusangiza abakunzi babo iyi ndirimbo mu buryo bw’amajwi, amashusho yayo agiye hanze nyuma y’imini 30 bamuritse imbanzirizamushinga.

Iyi ndirimbo Davis D yasubiranyemo na Big Fizzo amajwi n’amashusho yayo byatunganyijwe na Bagenzi Bernard mu gihe Li John ari we wasoje amajwi yayo.

‘Too Much’ - Juda Muzik na Alvin Smith

Itsinda rya Juda Muzik ryamurikiye abakunzi ba muzika nyarwanda imwe mu ndirimbo ziri ku muzingo muto w’indirimbo eshanu (5 Blessing of Juda) bakoranye n’abandi bahanzi batanu batandukanye.

Iyi ndirimbo bakoranye na Alvin Smith w’i Burundi, amajwi yayo yatunganyijwe na Bob Pro mu gihe amashusho yayo yakozwe na Sammy Switch.

‘Byuka’ – Yampano na Ally Soudy

Yampano yahuje imbaraga na Allly Soudy bakorana indirimbo bise ‘Byuka’ ishishikariza abakiri bato gufatirana amahirwe bahabwa buri munsi no kudacika intege mubyo bakora.

Iyi ndirimbo yanditswe n’abantu batandukanye barimo Yampano, AllySoudy, Juno Kizigenza, Zizou Alpacino, Knox Beat na Kalex Kavukire .

Amajwi yayo yatunganyijwe na Knox Beat asozwa na Bob Pro mu gihe amashusho yayo yakozwe n’abarimo Bruno & DaWest na Muhire Visuals ayoborwa na B8Films.

‘Si Swing’ - Yago

Nyarwaya Yago wiyeguriye umuziki muri iyi minsi, yamurikiye abakunzi ba muzika indirimbo ya gatatu yise ‘Si swing’ igaruka ku musore wanyuzwe n’ubwiza bw’umukunzi we akamubwira ko urwo amukunda ari ukuri.

Iyi ndirimbo amajwi yayo yatunganyijwe na Iyzo Pro, mu gihe amashusho yakozwe na Eazycuts afatanyije na Taher Visuals.

‘Ndashima’ – Ndori Tresol

Nyuma y’igihe gito Niyonizera Judith atangiye gufasha abahanzi binyuze muri Sosiyete ‘Judy Entertainment’ yamurikiye abakunzi ba muzika indirimbo ya mbere ivuye muri ibi bikorwa.

Ni indirimbo yo kuramya no guhimbaza Imana yiswe ‘Ndashima’ yakozwe na Ndori Tresol umuhanzi wa mbere winjiye mu mikoranire na ‘Judy Entertainment’.

Iyi ndirimbo yakozwe na Producer Sano, amashusho yayo ayoborwa na Harris Image.

‘Mapenzi’ – Nizman

Nyuma y’amezi 10 yari amaze atagaragara mu bikorwa bya muzika , Nizman yagarukanye indirimbo yise ‘Mapenzi’ igaruka ku musore watunguwe n’ubwiza bw’umukobwa akifuza kumukurikira ngo amusabe urukundo.

Iyi ndirimbo yatunganyijwe na Master key afatanyije na Evydecks ukorera mu Ibisumizi Records.

‘Akanyenyeri’ - Amag The Black

Umuraperi Amag The Black muri iki cyumweru yamurikiye abakunzi ba muzika indirimbo yise ‘Akanyenyeri’ igaruka ku basore bahora basabwa amafaranga n’abakobwa byitwa ko bakundana.

Iyi ndirimbo Amag The Black yayikoreye muri Omega Sound Records ikorwa na Black Beats mu gihe amashusho yayo yakozwe na Okimu.

‘Inkingi Negamiye’ ya Josh Ishimwe

Umuhanzi Josh Ishimwe uhuza umuziki wo kuramya no guhimbaza Imana na gakondo yasubiyemo indirimbo ya Padiri Gilbert Ntirandekura yise ‘Inkingi Negamiye’.

Amajwi y’iyi ndirimbo yatunganyijwe na Boris, mu gihe amashusho yayo yatunganyijwe n’abarimo Musinga, Kavoma na Cyusa.

‘Renge’ – Kellia

Umuhanzikazi Kellia muri iki cyumweru yamurikiye abakunzi ba muzika indirimbo yise ‘Renge’ igaruka ku nkuru y’urukundo rw’umukobwa ubwiza ukuri umukunzi we amubwira ko urwo amukunda ari umwimerere.

Iyi ndirimbo amajwi yayo yakozwe na Producer Muuv asozwa na Bob Pro mu gihe amashusho yayo yakozwe na B2B Records.

‘Warakoze’ - Mwiza Zawadi

Umuhanzikazi Mwiza Zawadi ubarizwa muri Sunday Entertaiment ahuriyemo na Niyo Bosco nubwo we bivugwa ko atari kumvikana neza n’ubuyobozi bw’iyi sosiyete.

Muri iki cyumweru uyu mukobwa yamurikiye abakunzi ba muzika indirimbo yise ‘Warakoze’.

Amajwi y’iyi ndirimbo yatunganyijwe na Santana Sauce mu gihe amashusho yayo yakozwe na Kayitare.

‘Batoneke’ - Sky2

Umuraperi Sky2 yamurikiye abakunzi ba muzika indirimbo yise ‘Batoneke’ yatunganyijwe na Laser Beat mu buryo bw’amajwi mu gihe amashusho yayo yakozwe na Tego afatanyije na Chris.

‘Humura’ - Boanerges Gospel Group

Itsinda rya Boanerges ryo muri Bethesda Holy Church, ryamurikiye abakunzi b’umuziki wo kuramya no guhimbaza Imana indirimbo bise ‘Humura’ ihumuriza abafite ibibazo bibaruhije ibibutsa ko Imana izabatabara.

Iyi ndirimbo iherekejwe n’ubutumwa buri muri Yesaya 50:7 handitse amagambo agira ati “Kuko Umwami Imana izantabara ni cyo gituma ntamwara, ni cyo gitumye nkomera mu maso hanjye hakamera nk’urutare, kandi nzi yuko ntazakorwa n’isoni.”

Amajwi yiyi ndirimbo yatunganyijwe na Producer Nicholas, mu gihe amashusho yayo yakozwe na BJC.

‘Isanamutima’ – Maitre Potien

Umuhanzi Maitre Potien muri iki cyumweru yamurikiye abakunzi ba muzika indirimbo yise ‘Isanamutima’ yatunganyijwe na Dr Pash mu gihe amashusho yayo yatunganyirijwe muri Eagles Eyes.

‘Bebe’ – Daddy V na JD Young

Umuhanzi Muvunyi Vacus ukoresha amazina ya Daddy V mu muziki yahuje imbaraga na JD Young bakorana indirimbo bise ‘Bebe’ yatunganyijwe na Bruno mu buryo bw’amajwi.

‘Ingobyi’ – Sam Muvunyi

Umuramyi Sam Muvunyi muri iki cyumweru yamurikiye abakunzi ba muzika indirimbo yise ‘Ingobyi’ yatunganyijwe na Jovan mu gihe amashusho yayo yayobowe na Sam Muvunyi.

‘Gihenomu’ – Imanirakarama Deo

Imanirakarama Deo yamuritse indirimbo yise ‘Gihenomu’ ikozwe mu njyana ya Drill ikubiyemo ubutumwa bwanditse muri Bibiliya buvuga ko Imana izarimbura Isi ikoresheje umuriro akaba asaba abantu guhinduka bakayumvira batazirimbuka.

‘Muhumure’ - Iradukunda Joshua

Umuhanzi w’indirimbo zo kuramya no guhimbaza Imana Iradukunda Joshua, muri iki cyumweru yamurikiye abakunzi ba muzika indirimbo yise ‘Muhumure’.

Iyi ndirimbo amajwi yayo yatunganyijwe na Tonto(Dayton) mu gihe amashusho yayo yayobowe na Emmy Smith afatanyije n’abarimo Mucyo Serge na Jean Luc.

‘Umuja wa nyagasani’ - Emmy pro - ft Dieudonne Mure & Pacis Ndahiro

Emmy Pro, Dieudonné Mure na Pacis Ndahiro basubiyemo indirimbo ‘Umuja wa nyagasani’ ya Padiri Dr Fabien Hagenimana.

Aba basore basanzwe ari aba Producer nibo bihurije hamwe batunganya amajwi y’iyi ndirimbo mu studio ya Universal record , amashusho yayo yakozwe na Aime Pride ndetse na Jean Claude .

‘Utabara abakristu’ - Saint Jean Bosco Kicukiro

Korali ya Saint Jean Bosco Kicukiro muri iki cyumweru yamurikiye abakunzi ba muzika indirimbo bise ‘Utabara abakristu’ yanditswe na Alfred Dushiminagabo.

Iyi ndirimbo amajwi yayo yatunganyijwe na Emmy Pro ukorera muri Universal Record mu gihe amashusho yayo yatunganyijwe na Aime Pride.