Pastor P ubusanzwe witwa Bugingo yabwiye IGIHE ko urupfu rw’umubyeyi wabo rwaje rutunguranye kuko nubwo yari arwaye ngo yari agifite imbaraga. Uyu mubyeyi yituye hasi nyuma y’uko yari amaze iminsi yivuza indwara y’impyiko.

Yagize ati “Ibi byabaye ku mugoroba wo kuwa Kane[kuwa 27 Mata 2017], yari amaze igihe yivuza impyiko ariko nkeka ko atari afite ikibazo gikomeye cyane. Nkeka ko ari intege nke yagize, ejo nimugoroba nyine yagiye mu bwiherero agira intege nke aranyerera.”

Pastor P usanzwe atunganyiriza indirimbo muri studio ye Beyond Records, yavuze ko nyuma y’uko umubyeyi we anyereye akitura hasi bahise bamujyana kwa muganga ageze mu maboko y’abaganga ashiramo umwuka.

Producer Pastor P ari mu gahinda ko kubura umubyeyi we witabye Imana

Se wa Pastor P yari afite imyaka 53 y’amavuko, yari atuye mu Karere ka Rusizi mu Mujyi wa Kamembe. Asize abana barindwi.