Selena usanzwe ari umuririmbyi n’umukinnyi wa filime ufite imyaka 33 hamwe n’umugabo we w’imyaka 37 basezeraniye muri California, kuri uyu wa Gatandatu, tariki 27 Nzeri 2025.

Selena Gomez yamenyesheje iyi nkuru nziza abakunzi be binyuze kuri Instagram, ashyiraho amafoto n’amashusho y’uyu munsi udasanzwe ari kumwe n’umugabo we, yandikaho amagambo make arimo imitima ibiri ndetse n’itariki yarongoreweho.

Aya mafoto agaragaza uko aba bombi basangiraga ibyishimo, bahuje urugwiro, bafatanye ibiganza.

Umugeni yari yambaye ikanzu ya Ralph Lauren y’umweru, mu gihe Blanco we yari yambaye ikote ry’umukara n’ishati y’umweru.

Mbere y’ubukwe, Selena yakorewe ibirori byo gusezera inshuti ze bizwi mu rurimi rw’Icyongereza nka ‘Bachelorette Party’ i Cabo San Lucas muri Mexique, mu gihe Benny Blanco we yakoreye ibirori bya ‘bachelor’ i Las Vegas.

Kuva hatangira kuvugwa inkuru y’ubukwe bw’aba bombi ibyamamare byinshi byari byatangiye kugaragaza uruhare rwabyo mu bukwe. Mu bakunze kuba hafi aba bombi harimo Taylor Swift, Ed Sheeran; abakinnyi ba filime Martin Short, Steve Martin na David Henrie ndetse na Paris Hilton na we yari ku rutonde rw’abatumiwe.

Aba bombi bari baragaragaje ko bashaka ubukwe bworoshye kandi butuje.

Selena Gomez na Benny Blanco batangiye gukundana muri Kamena 2023, nyuma y’imyaka bakoranye indirimbo ‘I Can’t Get Enough’ mu 2019. Urukundo rwabo rwagiye ku mugaragaro mu Ukuboza 2023. Nyuma y’igihe gito, batangiye kujya mu birori bikomeye hamwe. Muri ibyo harimo Golden Globes na Emmy Awards.

Mu Ukuboza 2024 nibwo Gomez yasangije abantu amafoto y’impeta yambitswe na Benny Blanco, amusaba kumubera umugore undi nta kuzuyaza arabyemera.

Selena Gomez yavuzwe mu nkuru z’urukundo n’ibyamamare bitandukanye. Mbere ya Benny Blanco uwo baherukaga gutandukana ni Zayn Malik.

Uyu muhanzi yakundanye igihe kinini na Justin Bieber, ndetse kenshi iyo uvuze inkuru ze zijyanye n’urukundo uyu muhanzi niwe uza mu mitwe ya benshi kuko bakanyujijeho.

Aba bombi batangiye gukundana mu 2009 batandukana mu 2014. Bongeye gusubirana mu 2014 bakundana by’igihe gito. Ubu Justin Bieber ni umugabo wa Hailey Baldwin barushinze mu 2018 banafitanye umwana w’umuhungu bise Jack Blues.