Mu kiganiro na IGIHE, Shaddyboo wari ufite akanyamuneza mu maso nyuma yo gusinya amasezerano y’umwaka yamamariza sosiyete ivana mu mahanga ibicuruzwa bitandukanye, yasubije abakunze kwibaza niba ateganya kongera gushaka umugabo.

Uyu mugore umaze imyaka atari mike atandukanye na Meddy Saleh bafitanye abana babiri, yavuze ko adafite inyota yo gushaka undi mugabo.

Ati “Ntakubeshye ndishimye, mfite abana banjye bankunda nanjye nkabakunda. Ntabwo mfite inyota y’umugabo. Nabihariye Imana […] naza sinzamusubizayo, niwe Imana izaba yanyoherereje kandi nzamushima. Ubwo igihe cyanjye kizaba cyageze cyo gushaka umugabo, ariko mu bitekerezo byanjye ntabwo ibyo bintu bijya bintakariza umwanya.”

Shaddyboo uri mu bakunzwe cyane ku mbuga nkoranyambaga ndetse byanatangiye kumwinjiriza akayabo, avuga ko yatangiye kuzikoresha yikinira ndetse ari n’uburyo bwo kubika amafoto y’urwibutso.

Uko iminsi yagiye yisunika uyu mugore akagira abamukurikira benshi, hari umubare w’abatari bake bakunze kumutuka bikomeye. Ahamya ko bimubabaza nk’undi muntu wese ufite umutima, ariko ku rundi ruhande ngo ntibyigeze bimuca intege.

Mu ntangiriro z’umwaka wa 2016 nibwo Meddy Saleh na Shaddyboo batandukanye.

Shaddyboo ashyira umukono ku masezerano ya miliyoni 54 Frw yo kwamamaza ibikorwa bya ‘ABANOUB General Trading Ltd’

Shaddyboo yari yishimiye amasezerano yasinye amwinjiriza akayabo

Ni umwe mu babashije kumenya uko ubwamamare bwe bwabyara umusaruro

Shaddyboo yavuze ko kwamamaza inzoga no kuzinywa atari icyaha nk'uko benshi babyitiranya n'amahame y'idini rye

Rwema Dennis ubanza iburyo niwe ufite mu nshingano gushakira amasoko Shaddyboo