Sintex yatandukanye n’umukunzi we wari muri Miss Rwanda 2020 bari bamaze imyaka itanu bakundana

Yanditswe na Nsengiyumva Emmy
Kuya 21 Gicurasi 2020 saa 02:03
Yasuwe :
0 0

Kabera Arnold uzwi nka Sintex mu muziki yahishuye ko yatandukanye na Mukeshimana Yvette wiyamamaje muri Miss Rwanda 2020 nyuma y’imyaka itanu bari bamaze mu munyenga w’urukundo.

Sintex aheruka gusohora indirimbo nshya yise “Love story”, bamwe bahuje n’urugendo rwe mu rukundo.

Ibyo gutandukana n’umukunzi we, Sintex yabigarutseho ubwo yari abajijwe niba indirimbo ye nshya ariyo nkuru yubakiyeho.

Yagize ati ”Sibyo, njye sindirimbira umuntu, ariwe nashyiramo n’amazina ye nkayimuha sinakwirirwa nyisohora. Iby’urukundo na we byari byo ariko twarakundanye, ndisegura ku bakunzi banjye bumvaga ko twakabaye tukiri kumwe. Ndi njyenyine ariko sinshaka umukunzi kuko ingufu zose nshaka kuzishyira mu muziki. Igihe ndimo si icyo gukundana, ni icyo gukora ntarangara.”

Sintex yahamije ko amaze nk’ukwezi atandukanye n’umukunzi we kandi ari ikintu cyamubabaje cyane.

Yavuze ko kugeza ubu nubwo badakundana ariko bakomeje ubucuti busanzwe. Ati “Twabyumvikanyeho, ntabwo twigeze dushwana ni inshuti yanjye angira inama kandi nanjye namugira inama.”

Uyu muhanzi wirinze kuvuga byinshi ku rukundo avuyemo na Mukeshimana yahishuye ko ariwe wari waramugiriye inama yo kwitabira Miss Rwanda 2020.

Yakomeje ati “Ninjye wari mukuru muri icyo gitekerezo nari n’umuterankunga.”

Mukeshimana yitabiriye irushanwa rya Nyampinga w’u Rwanda ntiyabasha kurenga icyiciro cyo guhagarira Intara y’Amajyaruguru aho yiyamamarije.

Sintex yasohoye indirimbo “Love Story” cyangwa ’‘Inkuru y’urukundo’’ nyuma y’izo yakoze mu minsi ishize zikamenyekana cyane nka "Why", "Super Star", "You" n’izindi nyinshi zatumye benshi babona uyu musore nk’impano ikomeye mu muziki w’u Rwanda.

“Love story” yasohotse mu buryo bw’amajwi aherekejwe n’amashusho agaragaza amagambo ayigize, ikaba yarakozwe na Iyzo Pro mu gihe amashusho yayo yo ateganya ko yazakorwa mu minsi iri imbere ubwo Covid-19 izaba itanze agahenge.

Ikiganiro na Sintex

Reba indirimbo nshya ya Sintex yise "Love story"

Sintex avuga ko yatandukanye na Mukeshimana bari bamaze imyaka itanu bakundana
Nubwo batandukanye ariko Sintex ahamya ko bitabagize abanzi
Mukeshimana yitabiriye irushanwa rya Miss Rwanda 2020 aviramo mu majonjora adatsindiye guhagararira Intara y'Amajyaruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .