Iki gihembo Sonia Rolland yagihawe mu muhango wiswe Gala d’Excellence wabereye muri hoteli Intercontinental mu Mujyi wa Paris ku mugoroba wo ku wa Gatandatu tariki 3 Ukuboza 2016.

Muri uyu muhango hahembwe abantu batanu bakoze ibikorwa by’indashyikirwa mu bafite inkomoko muri Afurika baba mu Bufaransa n’inshuti z’uyu Mugabane zagize uruhare mu bikorwa byiza.

Mu bahawe ibihembo ku bw’ibikorwa by’indashyikirwa bagezeho harimo Lionel Zinsou uyobora umuryango ‘Africa France’, Sonia Rolland, Jean-Jacques Konadje uzobereye mu by’ubumenyi bwa politiki, Françoise Le Guennou-Remarck uri mu bayobozi b’umuryango CFAO, ndetse n’umuhanzi Dawalla.

Sonia Rolland yahembewe ibikorwa by’ubugiraneza akora abinyujije mu muryango yashinze witwa “Maisha Africa” ufasha abana b’imfubyi za Jenoside yakorewe Abatutsi batishoboye, ubaha amafaranga y’ishuri, ibikoresho byo mu rugo, wubakira abadafite amazu batahamo, wubaka ibigo by’amashuri, ibitaro n’ibikorwa bigamije kuzamura umwana w’umunyarwanda muri rusange.

Nyuma yo gushyikirizwa igihembo Sonia Rolland yanditse kuri Instagram ashimira abamushyigikiye, abafatanyabikorwa n’abaterankunga mu bikorwa by’uyu muryango umaze imyaka 15 ushinzwe ndetse na Club Effience yamuhisemo nk’umwe mu bageze ku bikorwa by’indashyikirwa.

Ati “Mwakoze Club Efficience ku bw’iri shimwe ry’ikirenga riha agaciro imyaka 15 y’ubufatanye n’umuryango wanjye ‘Maisha Africa’. Ni iby’igiciro cyinshi.”

Uyu muhango wa Gala d’Excellence watangiyemo ibihembo by’ishimwe ry’ikirenga ku bageze ku bikorwa by’indashyikirwa, wanitabiriwe na bamwe mu byamamare barimo Samuel Eto’o Fils, Manu Dibango, n’abagize itsinda rya Magic System.

Sonia Rolland yatangiye ibikorwa by’ubugiraneza ari kumwe na nyina witwa Landrada Rolland muri 2001 ubwo yasuraga u Rwanda bashinga umuryango wo gufasha abana b’imfubyi batishobye witwa ‘Sonia Rolland pour les enfants’ nyuma uza guhindura inyito witwa ‘Maisha Africa’.