U Rwanda rurahagarariwe mu Iserukiramuco ry’Abahanzi bafite ubumuga ribera mu Burusiya

Yanditswe na Nsengiyumva Emmy
Kuya 1 Ugushyingo 2019 saa 11:37
Yasuwe :
0 0

U Rwanda ruri mu bihugu bine byitabiriye Iserukiramuco ry’abahanzi bafite ubumuga riri kubera mu Burusiya kuva ku wa wa Kane tariki 31 Ukwakira 2019.

Ni ku nshuro ya kabiri u Rwanda rwitabiriye iri serukiramuco rizwi nka World Music Parashow, risanzwe ribera mu Burusiya.

U Rwanda ruhagarariwe n’itsinda ry’abantu bane baturutse muri “Troupe Des Personnes Handicapées Twuzuzanye, Rwanda”, rwabaye igihugu cya mbere cya Afurika kiryitabiriye.

Ku wa 31 Ukwakira 2019 nibwo hatangijwe iri serukiramuco mu gitaramo cya mbere cyabereye mu Mujyi wa Kostroma. Itsinda ry’Abanyarwanda bafite ubumuga babyina gakondo ndetse banavuza ingoma za Kinyarwanda ryishimiwe bikomeye.

“Troupe Des Personnes Handicapées Twuzuzanye, Rwanda” ni umuryango w’abafite ubumuga ukora ubuvugizi n’ubukangurambaga ku burenganzira bwabo binyuze mu mpano zitandukanye ziganjemo ubuhanzi.

Muri uyu mwaka wa 2019 ku bufatanye na World Music Parashow ikorera mu Burusiya “Troupe Des Personnes Handicapées Twuzuzanye, Rwanda” yatumiwe mu gikorwa cy’iserukiramuco ari naryo berekanyemo imbyino z’umuco w’u Rwanda.

Iri serukiramuco rigomba kurangira tariki 8 Ugushyingo 2019 ryitabiriwe n’ibihugu bine aribyo Espagne, u Burusiya, u Rwanda n’u Butaliyani.

Mu Rwanda hitabiriye Egidie Nirere, Farida Kankundiye, Marie Appoline Buntubwimana na David Twizerimana bose babarizwa muri “Troupe Des Personnes Handicapées Twuzuzanye, Rwanda”.

Usibye iki gitaramo cyabaye hafungurwa iri serukiramuco, abavuye mu Rwanda babwiye IGIHE ko bagomba gukorera ibindi bitaramo bine, birimo bitatu bizabera mu Murwa Mukuru w’u Burusiya, Moscow.

Twizerimana yavuze ko abanyamahanga bakunze umudiho n’ingoma bya Kinyarwanda baserukanye.

Ati “Bishimiye uko twaserukanye umudiho gakondo ndetse n’ingoma za Kinyarwanda, wabonaga abantu babyishimiye bikomeye. Turashimira Humanity & Inclusion badufashije muri uru rugendo.”

Twizerimana yavuze ko uretse kugaragaza ko n’abafite ubumuga bashoboye, iri serukiramuco barifashe nk’amahirwe babonye yo kwereka Isi umuco w’u Rwanda.

Ubwo iri tsinda ryari rigiye guhaguruka i Kigali
Abaserukiye u Rwanda mu Iserukiramuco ry'abahanzi bafite ubumuga ubwo bari ku ndege berekeje mu Burusiya
Bageze mu Burusiya mbere yo kujya ku rubyiniro, bari bakenyeye bigaragaza umuco gakondo w'u Rwanda
Mu ijoro ryo gufungura iri serukiramuco abazatarama bose berekanywe
Mu Burusiya ngo bahasanze ubukonje bwinshi
Abaturutse mu Rwanda bari kwigisha abanyamahanga uko bavuza ingoma za Kinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza