Ciney na Tumusiime Ronald basezeraniye kuzabana akaramata nk’uko biteganywa n’amategeko y’u Rwanda agenga abashakanye mu muhango wabereye mu Murenge wa Kimihurura ku gicamunsi cyo kuri uyu wa Gatanu tariki ya 12 Gicurasi 2017.

Uyu muraperi yabwiye IGIHE ko nyuma yo gusezerana imbere y’amategeko bagiye guhita batangira kwitegura ibirori byo gusezerana imbere y’Imana mu itorero ry’Abangilikani, bazarushinga muri Nyakanga 2017.

Ciney n’umukunziwe witwa Tumusiime Ronald bamaranye imyaka irenga ine gato bakunda. Umusore aherutse gutungura Ciney amwambika impeta y’urukundo mu gitaramo cy’urwenya cyabereye muri Serena Hotel kuwa 26 Werurwe 2017.

Ciney umaze amezi abiri yambaye impeta ya fiançailles aherutse kwinjira mu itorero ry’Abangilikani ari naho bazasezeranira imbere y’Imana muri St Etienne mu Biryogo. Muri uru rusengero ni naho Muyoboke Alex n’umugore we basezeraniye nyuma na Tom Close na Tricia bahahanira igihango muri 2013

Ciney wakunzwe bikomeye mu ndirimbo ‘Tuma Bavuga’, ‘Salama’, ‘Igire’, ‘Ngwino Nkwereke’ n’izindi yahamirije IGIHE ko ubukwe bwe buzataha mu gihe kitarenze amezi abiri ndetse n’impapuro z’ubutumire zigiye gusohoka.

Yahamije ko namara kurushinga azakomeza kuririmba, ngo inshingano z’urugo ntizizamubera imbogamizi kuko ‘umukunzi we asanzwe amushyigikira bikomeye mu muziki’.

Ati “Umukunzi wanjye rero buriya ni umufana wanjye wa mbere, tujya tubiganiraho tukabitekerezaho. Ndumva nta kibazo, nimara gukora ubukwe nzabikomeza, nzakomeza ndirimbe.”

Tumusiime Ronald yemeye ko azaba umugabo w'indahemuka mu rugo rwe na Ciney

Ciney n’umusore bitegura kurushinga bafashe uyu mwanzuro nyuma y’imyaka ine bakundana mu buryo butamenyekanye cyane mu itangazamakuru. Uyu muhanzi avuga ko bwa mbere abona Tumusiime bahuriye kuri Radio 1 aho yakoze, uyu musore yazaga kuhareba undi muntu bakoranaga, baramenyana bubaka ubucuti busanzwe nyuma bibyara urukundo.

Aba bombi basezeraniye mu Murenge wa Kimihurura

Umuraperi Ciney yasezeranye imbere y’amategeko

Tumusiime Ronald, umugabo wa Ciney

Ciney na Tumusiime Ronald babanje kubwirwa amategeko agenga abashakanye mbere y'uko basezerana

Aba ni bamwe mu bagize umuryango wa Tumusiime Ronald

Aha basobanurirwaga ibyerekeye imitungo

Aba ni bo basinye nk'abahamya ku ruhande rwa Ciney

Ciney na we yemereye Tumusiime Ronald ko azamubera imfura

Tumusiime Ronald na Ciney bibarutse imfura

Agisohoka mu murenge, Ciney yahoberanye n'abo mu muryango we amarira ashoka ku matama

Amarira y'ibyishimo

Tumusiime Ronald yishimye kigabo

Amafoto: Mahoro Luqman