Iri rushanwa ritegurwa na kompanyi yitwa Miss Afrique Canada (MAC) isanzwe itegura amarushanwa ahuza abakobwa bakomoka muri Afurika mu kububakamo imbaraga n’icyizere.
Miss Afrique Canada, igamije guhuriza hamwe abakobwa bakibyiruka bo muri Afurika ariko batuye mu gihugu cya Canada mu kubaha ubumenyi no kubaremamo icyizere no kwitinyuka nk’uko bigaragara ku rubuga rw’iri rushanwa.
Muri uyu mwaka, irushanwa rya Miss Afrique Canada rihurije hamwe abakobwa cumi na bane bo mu bihugu bitandukanye birimo Sénégal, Côte d’Ivoire, Cameroun, Congo-Brazzaville, RDC, Guinée Conakry, Togo, Nigéria, Mali, Tanzanie n’u Rwanda.
Igihugu cy’u Rwanda cyaserukiwe na Nancy Sibylle Uwase mu gihe hari ibihugu bifitemo abakobwa barenze umwe. Repubulika Iharanira Demokarasi ya Congo ifitemo abakobwa batatu naho Cameroun ikagiramo abakandida babiri.
Nancy Sibylle Uwase watoranyijwe guhagararira u Rwanda, yavukiye i Kigali mu 1994 ariko ubu atuye muri Canada. Ni umuhanga mu byo kumurika imideli ndetse amenyereye amarushanwa y’ubwiza; mu 2013 yagizwe Miss Afrique Québec ahigitse benshi mu bakobwa bo muri Afurika yari ahanganye na bo.
Uwase Nancy Sibylle yatangiye kwiyamamaza akoresheje imbuga ze nkoranyambaga ndetse yavuze ko “ari ishema guserukira u Rwanda muri Miss Afrique Canada 2018”, ngo hari icyizere ko ashobora gutsinda.
Miss Afrique Canada, izasozwa ku itariki ya 23 Kamena 2018 mu birori bizabera kuri Olympia mu Mujyi wa Montréal. Aba bakobwa bose baziyerekana mu mbyino no mu bikorwa bitandukanye bazakora buri wese yerekana umwimerere w’igihugu cye.
Uko waha amahirwe Uwase Nancy muri Miss Afrique Canada
TANGA IGITEKEREZO