Video igaragaza ibisubizo bya Mutoni Tania watutse Isheja Sandrine na bagenzi be

Yanditswe na Munyengabe Murungi Sabin
Kuya 31 Mutarama 2018 saa 12:36
Yasuwe :
0 0

Mutoni Muvunyi Tania yifatiye ku gahanga itsinda rishinzwe gutoranya abakobwa mu irushanwa rya Nyampinga w’u Rwanda, yibasiye buri wese abaryoza ko bamuhaye amanota make bikamubuza kwinjira mu bahatana.

Muvunyi Umutoni Tania afite imyaka 19, akareshya na na metero 1.85 agapima ibiro 65. Uyu ari mu bakobwa 16 bahataniye ikamba mu ijonjora ryabereye mu Mujyi wa Kigali ku itariki ya 27 Mutarama 2018.

Umutoni Tania wari wambaye nomero 11 mu irushanwa yatanze ibisubizo bitanyuze akanama nkemurampaka bityo abakagize bose bafata umwanzuro ko adakwiye gukomeza mu cyiciro cya nyuma ku rwego rw’igihugu.

Uyu mukobwa yavuze amagambo arimo uburakari n’ibitutsi ku bagize akanama nkemurampaka ka Miss Rwanda 2018 kayobowe na Isheja Sandrine. Yavuze ko abatanga amanota bose muri iri rushanwa bazajya ikuzimu kuko “bafite umutima wamunzwe na ruswa”.

Kuri Mutoni Tania yatukanye avuga ko yarenganyijwe ashingiye ku bisubizo yatanze, ubwiza bwe n’uko yitwaye. Mu bibazo bigera kuri bitanu yabajijwe, Mutoni Tania ntiyabihamije neza nk’uko byagaragajwe n’amanota y’abakemurampaka ari nayo mpamvu yabuze mu bakwiye guhatana ku rwego rw’igihugu.

Isheja Sandrine ni we wabanje kubaza Mutoni Tania. Mbere y’uko amubaza, yarabanje amumara ubwoba amubwira ko adakwiye kugira ikibazo na gito ahubwo ko yasubiza atuje[mu buryo bwo kumubuza kugira umutima uhagaze].

Yamubajije icyo ‘ubuyobozi bwiza’ bivuga maze undi asubiza agira ati “Kuri njyewe ubuyobozi bwiza uko mbyumva, ni igihe abayobozi bayoboye abantu baba bashoboye kumva abaturage bagashobora kubakorera ibyo baba bifuza byose.”

Isheja yahise abaza uyu mukobwa ati “Buriya se birashoboka ko wakorera abaturage ibyo bifuza byose?” Undi ati “Akenshi ntabwo biba bishoboka, biba bigoranye ariko bakoresha uko bashoboye kose kugira ngo buzuze ibyo abaturage babasaba.”

Rwabigwi Gilbert yabajije uyu mukobwa ikintu akunda mu buzima busanzwe maze avuga ko aryoherwa cyane no ‘gushushanya’. Yahise amubaza ingingo ikomeye yumva yazibandwaho mu mwiherero abakobwa bazakora muri Miss Rwanda Mutoni Tania asubiza ati “Ndakeka bizafasha abatambutse hano no mu zindi ntara kuzuza ibikubiye mu mishinga yabo.”

Rwabigwi yongeye kumubaza ati “Uretse gushushanya nta kindi akunda mu buzima?” Undi ati “Kurya no kuryama!” Arongera aramubaza ati “Urarya cyane?” uyu mukobwa arasubiza ati “ Ntabwo ari cyane ariko iyo ndya mba numva nishimye.”

Dr Dr Higiro Jean Pierre yahise abaza Tania Mutoni ati “Uti njyewe nikundira indyo y’Abataliyani. Ese iy’Abanyarwanda yarakubihiye?” Tania arasubiza ati “Ntabwo yambihiye ariko niyo[iy’Abataliyani] ndya nkumva irandyoheye.”

Yahise abazwa nk’ibiryo yumva yatekera umunyamahanga ashaka kumwereka indyo nyayo yo mu Rwanda undi arasubiza ati “Namutekera imvange, harimo ibirayi, ibitoki n’ibishyimbo. Kubera ko nizeye ko Abanyarwanda ari byo baryaga bitari birimo amavuta, barabitogosaga akaba ari byo bibabeshaho.”

Amagambo yuzuyemo ibitutsi uyu mukobwa yandikiye abagize akanama nkemurampaka ka Miss Rwanda 2018 yakwirakwijwe ku mbuga nkoranyambaga aho bamwe bagaya cyane uyu mwari abandi bakamunenga cyane bavuga ko ‘byari kuba ari ikosa kumuha amahirwe yo guhatanira kuba Nyampinga w’u Rwanda’ kuko yagaragaje imyitwarire ye nyakuri.

Uyu mukobwa amaze gutsindwa yibasiye akanama nkemurampaka agashinja gukoreshwa na ruswa

Camera&Editing: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza