Yabaye mayibobo n’umushumba, akizwa no kwiruka! Ubuzima bukakaye bw’umuhanzi Uncle Austin yasinyishije

Yanditswe na Nsengiyumva Emmy
Kuya 31 Ukwakira 2019 saa 03:16
Yasuwe :
0 0

Muri iyi minsi abahanzi bafite amazina amaze gukomera bahagurukiye gufasha abakiri bato, Uncle Austin yakoze kompanyi yitwa The Management ibarizwamo we na Victor Rukotana, kuri ubu yanamaze gusinyisha Sedy Djano umunyarwanda uba muri Leta Zunze Ubumwe za Amerika.

Sedy Djano wahishuye ko yasinye muri iyi kompanyi ya Uncle Austin ariyo ireberera inyungu ze mu muzika.

Mu kiganiro yagiranye na IGIHE yaduhishuriye ubuzima bwe bukakaye yabayemo mbere y’uko agera muri Leta Zunze Ubumwe za Amerika aho atuye kugeza ubu.

Amazina ye asanzwe,yitwa Cedrick Djano, yakuriye i Muhanga abana na nyina ndetse na bashiki be mu buzima bwari bubi cyane kurya ari rimwe na rimwe nk’uko abyivugira.

Sedy avuga ko kuburara no kwicwa n’inzara ari byo byatumye afata icyemezo ava mu rugo afite imyaka 14 yerekeza muri Uganda aho yari agiye gushakisha imibereho.

Nubwo byari bigoye ko avuga ubuzima bwe, uyu muhanzi yagiye muri Uganda yitendetse ku ikamyo yari yerekejeyo ivuye mu Rwanda.

Ageze muri Uganda nta muntu yari aziyo yewe nta n’ururimi na rumwe ruhakoreshwa yari azi. Byatumye aba umwana wo ku muhanda abo benshi bita mayibobo.

Nyuma y’igihe ari mayobobo yigiriye inama yo kujya gusenga, abakirisitu batashye ahitamo kuryama mu rusengero kubera inzara agatotsi gahita kamwiba.

Hatungutse umuntu bataziranye amubaza impamvu asigaye mu rusengero wenyine, ku bw’amahirwe uwo muntu yari azi Ikinyarwanda baraganira.

Nyuma yo kumuganiriza ubuzima bwe uwo musore yiyemeje kumujyana bakabana akamukura ku muhanda.

Uyu wari umujyanye ngo babane yari asanzwe yoza imodoka mu kinamba, amusaba ko bajya bafatanya kugira ngo babone ubushobozi bwo kubaho.

Sedy aka kazi karamunaniye kuko kamusabaga imbaraga kandi akiri muto. Nyuma yaje gusabwa n’uwari wamutoraguye ko yamwohereza mu cyaro cya Uganda kwa Nyirasenge.

Uyu muhanzi yagiye kuba kwa nyirasenge w’uyu musore wari wamutoraguye. Kubera kubyuka abona abandi bana bajya ku ishuri we ntajyeyo yasabye ko yashakirwa akazi byibuza ntajye yirirwa yicaye mu rugo. Nibwo bamurangiye ako kuba umushumba.

Avuga ko umunsi umwe aragiye, inka zamunyuze mu rihumye zijya kona. Yongeraho ko aho bari batuye konesha byashoboraga kuvamo igihano gikomeye.

Uyu musore wari wiboneye abo yoneshereje bashoreye inka yari aragiye avuga ko atigeze ataha ahubwo yahise asubira i Kampala, yisubirira mu buzima bw’umuhanda.

Nyuma yo kubabazwa bwa kabiri n’ubuzima bw’umuhanda yigiriye inama yo gusubira kuri wa musore wari wamucumbikiye ku ikubitiro.

Uwo musore yababajwe n’amakosa Sedy yakoze ariko aramwakira. Akazi ko koza imodoka nanone karamunaniye ahitamo kujya ku muhanda gushakisha.

Sedy yaje guhura n’umwana umwe wajyaga kwiga icyongereza hafi y’aho bari batuye yamuherekeje ku ishuri asanga hariyo imashini na internet by’ubuntu. Si ibintu yari azi ahubwo ni uko yakundaga gukubagana cyane, yarahirirwaga bwakwira agataha.

Kuri iki kigo niho yahuriye n’umuzungu wamufashije kuva muri Afurika amujyanye muri Leta Zunze Ubumwe za Amerika.

Akigerayo yahise atangira kwiga muri Leta ya Mississippi mu mwaka wa cyenda yiga ashyizemo imbaraga aza kurangiza. Icyakora nk’umwirabura bamubonagamo impano yo kwiruka.

Abatoza bo kwiruka batangiye kumufasha bityo aza kuvamo icyamamare mu mukino wo kwiruka mu ishuri ryo muri Leta ya Mississipi ari naho atuye kugeza ubu.

Ati “Ku ishuri nigagaho nta mupira w’amaguru bagiraga, umutoza umwe yambajije niba nabasha kwiruka ndamubwira nti nagerageza. Ni uko natangiye imyitozo. Irushanwa rya mbere nabaye uwa mbere mu marushanwa yo kwiruka yahuzaga ibigo byo muri iyo leta.”

Uyu musore yavuze ko yagiye atwara imidari ku buryo umukino wo kwiruka nawe yageze aho akawukunda akabikora kinyamwuga.

Yari umuhanga mu kwiruka ibirometero 3200 na 5000, ari nabyo byamwishyuriye muri Koleji, aho yatsindiye imidari itari mike.

Ati “Mu by’ukuri nabonye ko ntakure Imana itakura umuntu, kuvuga ngo umwana wo ku muhanda ageze ku rwego za koleji zo muri Amerika zimurwanira akaba ikimenyabose kubera kwiruka. Ni imbaraga zirenze z’Imana.”

Uyu musore yarangije muri koleji mu mwaka wa 2014 yishyuriwe n’umukino wo kwiruka. Icyakora mbere gato yari yabanje kuvunika amaguru yombi ibyo kwiruka biranga.

Sedy avuga ko yarangije kwiga ibijyanye na “Telecommunication” ubu aribyo aba akoramo akazi gasanzwe, kwiruka abishyira ku ruhande.

Nubwo yirukaga ariko uyu musore yumvaga yatanga ubutumwa ashishikariza abantu kubana neza, kureka amashyari n’ibindi nk’ibyo.

Uko yirukaga yabonaga bigoye ko yatanga ubwo butumwa ahitamo kuba yakora umuziki mu rwego rwo kugera ku nzozi ze.

Yatangiye umuziki mu mwaka wa 2018 aho yakoze indirimbo zirimo; Ntabe ari njye yakoranye na Serge Iyamuremye ndetse na Be Kind yakoranye na Riderman na Social Mula. Iya gatatu ikaba iyo yakoranye na Uncle Austin yise “Don’t Judge”.

Uyu musore agira inama umuntu wese ujya yicara agatekereza ko ubuzima bwamurangiranye yagize ati” Ntiwihebe kuko ibyiza biri imbere, uyu munsi biragoye ariko iyo udacitse intege ugakora cyane impano iyo ariyo yose wayibyaza umusaruro.”

Reba ikiganiro twagiranye na Sedy Djano umuhanzi mushya uri gufashwa na Uncle Austin

Reba indirimbo nshya uyu muhanzi yakoranye na Uncle Austin

Sedy na Riderman bafitanye indirimbo bakoranye na Social Mula
Sedy na Social Mula bakoranye indirimbo irimo na Riderman
Sedy ubu ari kubarizwa i Kigali mu karuhuko k'igihe gito
Sedy ubu yamaze kwiyongera ku bahanzi nka Uncle Austin na Victor Rukotana babarizwa muri 'The Management'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza