Iyi filime izwi ku izina rya Zootopia 2 mu bihugu bimwe, yaciye kuri ‘Inside Out 2’ yari ifite agahigo mbere, yo yari yarinjije miliyari 1,69$ nyuma yo gusohoka mu 2024.

Uretse kuba ari iya mbere muri filime ya ‘animation’ ya Hollywood, Zootropolis 2 yahise iba iya cyenda muri filime yinjije amafaranga menshi kurusha andi yose mu mateka ya sinema ku Isi, iza inyuma ya filime nka Avatar, Titanic, Avengers: Endgame na Star Wars: The Force Awakens.

Nubwo ari intsinzi ikomeye kuri Hollywood, filime ya ‘animation’ yinjije amafaranga menshi kurusha izindi zose ku Isi hose iracyari iyo mu Bushinwa yitwa ‘Ne Zha 2’, yinjije miliyari 2,2$ mu 2025, hafi ya yose iyakuye ku isoko ry’imbere mu Bushinwa.

Zootropolis 2 yasohotse mu Ugushyingo 2025, ikorwa ku ngengo y’imari igera kuri miliyoni 150 z’Amadolari. Ni filime ikurikirana iya mbere yasohotse mu 2016.

Umuyobozi Mukuru Wungirije wa Disney Entertainment, Alan Bergman, yavuze ko iyi ntsinzi ishingiye ku bafana.

Ati “Iyi ntambwe ikomeye igenewe mbere na mbere abafana bo hirya no hino ku Isi, kuko ari bo bagize uruhare runini mu kuyigeraho. Twishimiye cyane abakoze iyi filime; Zootopia 2 ni igikorwa kidasanzwe.”

Iyi filime yanabaye filime ya mbere ya Hollywood ya animation yageze kuri miliyari 1$ mu gihe gito cyane.

Filime zinjije amafaranga menshi kurusha izindi mu mateka

Avatar (2009) – Miliyari 2,92$

Avengers: Endgame (2019) – Miliyari 2,79$

Titanic (1997) – Miliyari 2,26$

Avatar: The Way of Water (2022) – Miliyari 2,25$

Ne Zha 2 (2025) – Miliyari 2,21$

Star Wars: The Force Awakens (2015) – Miliyari 2,07$

Avengers: Infinity War (2018) – Miliyari 2,05$

Spider-Man: No Way Home (2021) – Miliyari 1,92$

Zootopia 2 (2025) – Miliyari 1,70$

Inside Out 2 (2024) – Miliyari 1,69$