Aime Uwimana umuhanzi ukomeye mu indirimbo z’Imana yateguye umugoroba azifatanyamo n’abahanzi bagenzi be bataramira Abanyarwanda, baramya banahimbaza Imana mu gitaramo cyitwa ’Hymn worship evening’.

Mu kiganiro IGIHE yagiranye n’umuhanzi Aime Uwimana , yavuze ko iki atari igitaramo cye kuko ari umugoroba wo kuramya Imana yateguranye n’abandi bahanzi n’abaramyi baturuka mu matorero atandukanye. Uyu mugoroba wateguwe ku bufatanye n’Itorero rya Christian Life Assembly ( CLA ) riherereye i Nyarutarama ari naho iki kizabera.

Yakomeje avuga ko bateguye iki gitaramo bagamije kugirana ubusabane n’Imana no gukomeza agakiza k’abakristu aho bizeye neza ko bizakora ku mitima ya benshi.

Abazitabira iki gitaramo bazataramirwa n’abahanzi batandukanye kandi bakomeye mu ndirimbo zihimbaza Imana mu Rwanda nka Aime Uwimana ,Patient Bizimana , Dominic Nic , Aline Gahongayire , Yvan Ngenzi , Liliane Kabaganza , Gaby Irene Kamanzi , Damascene Kanuma , Serge Iyamuremye n’abandi benshi.

Kwinjira muri iki gitaramo ni ubuntu kandi abazacyitabira bose bazagirirwa ubuntu bwo kumva indirimbo nyinshi bagiye bakunda ziri mu gitabo nka Nyuzwe n’ubucuti , Ni Yesu wangize kuba umuvandimwe we , Gitare cy’Imana ,Ntabwo nkwiye kujya niganyira ndetse n’iza bahanzi batandukanye zagiye zikundwa.

Biteganyijwe ko iki gitaramo kizaba ku Cyumweru tariki 9 Ugushyingo 2014 i Nyarutarama kuri Christian Life Assembly ( CLA ) kuva saa kumi n’imwe z’umugoroba.