Iki gitaramo cyabaye mu ijoro ryo kuri iki cyumweru muri Serena Hotel. Cyatangiye saa kumi n’ebyiri kirangira saa tatu n’igice z’umugoroba.

Cyitabiriwe ku rwego rwo hejuru n’ab’ingeri zitandukanye barimo; abana, urubyiruko, abakuru, abakecuru n’abasaza, abanyamahanga bose bashimishijwe no kwihera ijisho umuziki wa kera wanyuraga amatwi n’imitima ya benshi.

Iki gitaramo cyaririmbwemo indirimbo 20 zo mu ndimi zitandukanye zirimo Ikinyarwanda, Igifaransa, Icyongereza, Igiswayile, Ikiyahudi n’Ikizulu.

Abenshi wasangaga bacengewe n’uburyohe bw’umuziki, igitaramo cyatangiye bahagaze kirinda kirangira bagiye mu mwuka wo gusingiza Imana.

Aba baririmbyi bakoresheje indirimbo zitandukanye zirimo izo bihimbiye, ndetse n’izabandi bahanzi basanzwe barimo; Byumvuhore Jean Baptiste, Rugamba Cyprien n’abo hanze y’u Rwanda.

Zimwe mu ndirimbo zanyuze benshi baririmbye zirimo ‘Imenagitero’, ‘Igipimo cy’urukundo’ n’Urumenesha za Rugama, ‘Abatoya Ntibagapfe’ ya Byumvuhore, ‘Wana baraka’ iri mu ndirimbo gakondo zo muri Kenya, ‘Salaam Maria’ n’izindi nyinshi.

Uko iyi korali yaserukaga buri gice kirangiye yagarukanagautundidushya mu micurangire n’imiririmbire, byatumaga benshi bahaguruka bakabyina.

Igitaramo kijya guhumuza, baserutse mu buryo bwa gitore mu myambarire ya Kinyarwanda, abategarugori bacinya akadiho byimazeyo abagabo barataraka karahava.

Umuyobozi wa Christus Regnat, Nyaruhirira Alice, yavuze ko yishimiye uburyo iki gitaramo cyitabiriwe.

Ati” Ijambo ryanjye ni rigufi gusa icyo nshaka kuvuga ni ugushima. Gushimira Imana yadushoboje ko iyi Korali tunayishimira ko yadukomeje tugakomeza uyu muhamagaro, abatureze, nkashimira abadufashije ndetse namwe muri hano”.

Korali Christus Regnat yashinzwe mu 2006, ivukira kuri Centre Christus i Remera mu Mujyi wa Kigali. Kuva mu 2008, ibarizwa kuri Paruwasi Regina Pacis i Remera.

Ubu ifite imizingo itandatu y’indirimbo zabo mu buryo bw’amajwi, imaze gukora ibitaramo bikomeye bitatu.

Amafoto: Kadaffi Pro