Hateguwe nanone igitaramo cyiswe “Gospel Bye Bye Vacance’’ gitegurwa n’itsinda ‘Urugero Media Group’ rifatanyije na ‘Fruits of Love Ministries’ kizabera Kicukiro-Centre kuri Glory To God Temple ku wa Gatandatatu tariki 22 Mata 2013 guhera saa munani (14h).

Iki gitaramo kigiye kuba ku nshuro ya kabiri, kiba gifite intego yo gufasha abanyeshuri gusubira ku mashuri yabo bajyanye impamba y’ijambo ry’Imana, nk’uko Ndabarasa Sebatware Costa, ushinzwe ibikorwa muri Urugero Media Group, yabitangarije IGIHE.

Sebatware yagize ati: “Ubusanzwe, dutegura ibitaramo bibiri, harimo icyo kwakira abanyeshuri, cyane cyane ab’abakirisitu, baje mu biruhuko twita ‘Gospel Bonjour Vacances’ tugira ngo batangire ibiruhuko bari mu mwuka, ndetse n’iki cya ‘Gospel Bye Bye Vacances’ mu rwego rwo gufasha abanyeshuri gukomeza kwegera Imana no kubashishikariza kurangwa n’indangagaciro z’ubukirisitu ku ishuri ndetse n’aho ari ho hose bazaba bagiye no kurushaho kuba inyenyeri z’agakiza mu badakijijwe kugira ngo nabo bakire agakiza, kandi kwinjira muri iki gitaramo ni ubuntu..”

Yongeyeho ko ‘Urugero Media Group’ ari itsinda ry’abasore biyemeje gushyigikira umurimo w’Imana mu Rwanda, bakaba bategura iki gikorwa bafatanyije na Minisiteri y’ivugabutumwa yitwa ‘Fruits of Love’.

Abahanzi bateganyijwe kuzitabira iki gitaramo harimo ‘Patient Bizimana’, ‘Uzamukunda Goreth’, ‘Olivier Roy’, ‘Asa Jean de Dieu’, ‘Uncle Sam’, True Promises’, ‘Ndabarasa’ uramya Imana mu muco nyarwanda, ‘Drama Team’ yo mu itorero rya Glory To God na Korali ‘Alarm Ministries’ iherutse gutwara Salax Awards 5 cy’uko ariyo yahize izindi mu Rwanda mu mwaka wa 2012 mu kugaragaza ingufu zo kwamamaza ijambo ry’Imana.