Mu kwizihiza isabukuru y’imyaka 16 imaze ibayeho korali Jeovah Jileh CEP ULK yateguye igitaramo yise ”Turakwemera Live concert” kikaba gifite intego y’uko abaririmbyi bayo bakeneye gushyigikirwa muri uyu murimo wo kuririmbira Imana no kuyishimira uburinzi bwayo ku Banyarwanda.

Ubuyobozi bw’iyi korali buganira na IGIHE bwavuze ko bateguye iki gitaramo mu rwego rwo kwizihiza isabukuru y’imyaka 16 bamaze babayeho nka korali Jeovah Jileh CEP ULK ikindi kikaba kiri no mu ntego yo gusoza umwaka bifatanya n’Abanyarwanda gushima Imana yabarindiye igihugu.

Muri iki gitaramo hakazanakusanywa inkunga yo gushyigikira umurimo w’ivugabutumwa muri iyi korali.

Umuyobozi wa korali Jeovah Jileh CEP ULK yagize ati “Ntabwo twakwirengagiza gushima Imana kuko yagiye itwiyereka cyane muri uyu murimo. Twatangiye tubona bitoroshye nk’abanyeshuri ko twakora korali igashinga imizi none imyaka 16 irashize duhagaze neza mu murimo dushimwa n’Imana dukorera ndetse tunakorana neza n’itorero umubyeyi rya ADEPR dushima cyane ko ritigeze ritezuka mu kutuba hafi”.

Muri iki gitaramo korali Jehovah Jileh yitiriye indirimbo yabo yakunzwe cyane bise”Turakwemera” izifatanya n’umuhanzi Dominic Nic n’umuvugabutumwa Zigirinshuti Michel.

Kizaba ku Cyumweru tariki 28 Ukuboza 204 guhera saa cyenda kikazabera mu busitani bwa Serena Hotel. Kwinjira umuntu azaba afite urupapuro rumutumira cyangwa akagura Album DVD y’indirimbo zabo izaba igurishwa amafaranga ibihumbi bitanu(5.000Frw) y’u Rwanda.