Marius Bison waretse kuba padiri kubera umuziki, yahimbye indirimbo ivuga ibigwi bya Bikira Mariya

Yanditswe na Uwiduhaye Theos
Kuya 18 Ukwakira 2020 saa 11:41
Yasuwe :
0 0

Umusore witwa Jacques Marius Kamana [Marius Bison] waretse kuba umupadiri kubera urukundo rwa muzika, yashyize hanze indirimbo nshya yise ‘Ibigwi by’umubyeyi’ afasha abakirisitu kwizihiza ukwezi kwahariwe Bikira Mariya.

Marius Bison yakoze mu nganzo kugira ngo afashe abakirisitu b’Isi yose kwizihiza uku kwezi kwahariwe Umubyeyi Bikira Mariya, maze amurata ibigwi mu ndirimbo ye nshya.

Yabwiye IGIHE ko yatekereje iyi ndirimbo kubera ko yifuzaga gufasha abantu gukomeza kuzirikana ibigwi bya Bikira Mariya.

Ati “Ni indirimbo maze igihe kinini ntekereza kuzakora. Numvaga nshaka gukora igihangano kigaruka ku bigwi bya Bikira Mariya. Nifuzaga gukora igihangano cyo gufasha abantu bose.”

Marius Bison ni umuhanzi, umuririmbyi, umucuranzi n’umwarimu wa muzika mu makorali anyuranye muri Kiliziya Gatolika ndetse wize mu iseminari nkuru ahategurirwa abapadiri gusa akaza kubivamo kugira ngo ubutumwa bwe azabutange abunyujije mu ndirimbo kuko ariho yabonaga byamworohera kubusakaza.

Isengesho rya Rozari cyangwa ishapule ni isengesho ry’umwihariko wa Kiliziya Gatolika, kubera icyubahiro iha Umubyeyi Bikira Mariya bishingiye ku kuba Imana yaramutoye ikamuha kugira uruhare mu mateka y’ugucungurwa kwa muntu.

Iryo zina Rozari rifite inkomoko yaryo mu kilatini “Rosarium” bivuga “Roses” mu Gifaransa; mu Kinyarwanda bigasobanura “Indabo z’amaroza”, bishushanya ko Bikira Mariya atatse amaroza.

Kuva mu kinyagihumbi cya kabiri, Rozari yahawe agaciro gakomeye. Nyuma y’uko Bikira Mariya abonekeye Mutagatifu Dominiko (1170-1221), mu 1214, nibwo yahise ategura neza iri sengesho, maze ryitwa rityo ‘isengesho rya Rozari cyangwa ishapule ya Rozari’, arangije arikwirakwiza mu bakirisitu. Iri sengesho ryamufashije mu rugamba rwo guhangana n’abarimo gukwirakwiza inyigisho z’ubuyobe.

Umuhanga mu by’amateka witwa Kasiteliyusi (Castellius) agereranya Mutagatifu Dominiko nk’Umubyeyi wa Rozari bitewe n’uburyo yahumekewemo n’Umubyeyi Bikira Mariya.

Amateka agaragaza kandi ko Bikira Mariya amaze kubonekera Dominiko mu 1214, yatangiye kwamamaza n’umutima we wose n’imbaraga ze zose Rozari ntagatifu mu bemera bose. Nyuma y’imyaka ibiri abonekewe na Bikira Mariya, mu 1216, yahise ashinga ikigo cy’Abihayimana b’Abogezabutumwa (les Dominicains ou les Frères Prêcheurs).

Abo bihayimana batangiye gushyiraho uburyo buhamye bwo kuvuga ishapule, cyane cyane bibanda ku buzima bwa Yezu na Mariya, umwambaro wabo bawukenyeza ishapule nini.

Marius Bison amaze gukora indirimbo zitandukanye zirimo ‘Nkwamamaze’ yakoranye na Uncle Austin, ‘Mbaye uwawe’ n’izindi.

Marius Bison azwi mu makorali yo muri Kiliziya Gatolika nk'umuririmbyi w'umunyempano
Marius Bison yafashije abakirisitu kwizihiza ukwezi kwahariwe Bikira Mariya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .