Korali Itabaza ibarizwa mu Ntara y’Amajyepfo mu Karere ka Muhanga ikorera umurimo w’Imana mu Itorero rya ADEPR Paruwasi ya Gahogo, nyuma y’imyaka 14 imaze ibayeho ubu yuzuye amashimwe ku Mana yabafashije mu gutegura album DVD bise ‘‘Turi Abanyamahirwe’’.

Ubuyobozi bw’iyi korali buganira na IGIHE bwavuze ko nyuma y’uko bakoze ingendo z’ivugabutumwa mu bice bitandukanye by’igihugu bamaze iminsi bahugiye ku gikorwa cyo gutunganya Album y’amashusho igizwe n’indirimbo 11. Ubu ngo buzuye amashimwe ku Mana yabafashije mu mitegurire y’iyi Album yaba mu buryo bw’amajwi ndetse n’amashusho.

Ubundi Korali Itabaza yatangiye umurimo w’ivugabutumwa mu buryo bw’indirimbo mu mwaka w’i 2000 icyo gihe ikaba yaritwaga iy’icyumba cy’amasengesho iza kwitwa Itabaza ku itariki ya 02 Ukwakira 2005 kugeza ubu igizwe n’abaririmbyi 64.

Nyuma yo gutunganya izi ndirimbo mu buryo bw’amajwi ndetse n’amashusho bari gutegura igitaramo gikomeye cyo gushyira ku mugaragaro iyi Album yabo ya mbere. Itariki iki gitaramo kizaberaho bakaba bazayitangaza mu minsi ya vuba cyane.