Uwiringiyimana Théogène uzwi mu muziki nka Théo Bosebabireba yahisemo gukorera amashusho y’indirimbo ze nshya mu nzu zisakaje nyakatsi bityo ahitamo kwerekeza i Burundi ari naho hakiboneke izi nyubako.

Mu kiganiro Théo Bosebabireba yagiranye na IGIHE yatangaje ko amaze i Burundi hafi ibyumweru bitatu , yahakoreye indirimbo eshatu mu majwi n’amashusho ndetse agira umugisha wo gutaramira abakunda ibihangano bye muri iki gihugu.

Ati “Ndi i Burundi, nagezeyo ku itariki ya 26 Kanama 2014. Mu byanjyanyeyo ahanini ni ugukora amashusho y’indirimbo zanjye , nahakoreye indirimbo eshahu zifite amashusho ariko hari n’ibitaramo nakoze hari n’icyo nafatanyije na wa muhanzi wo muri Tanzania witwa Bony Mwaitege. Byabaye byiza cyane”

Impamvu nyamukuru yamuteye kujya gukorera amashusho y’izi ndirimbo ze i Burundi, ngo ni uko ari cyo gihugu bugufi mu karere yasanze kigifite inzu za nyakatsi kandi ari na zo yifuza kugaragaza muri izi ndirimbo ze bitewe n’ubutumwa ashaka gutambutsa.

Théo Bosebabireba ati “Impamvu nahisemo kuza hano i Burundi, ni uko nashakaga gukora videos zanjye ndi mu nzu za nyakatsi. Mu Rwanda ntiwapfa kuhabona nyakatsi ariko i Burundi zirahari. Naje nshaka nyakatsi kandi byaratunganye amashusho narayakoze yararangiye igisigaye ni ukuyazanira abakunda ibihangano byanjye. Nzagera i Kigali kuwa Gatatu”

Zimwe mu ndirimbo Théo Bosebabireba yakoreye i Burundi harimo: Miliyoni y’amadorali, Agaciro kanjye, Uwabambwe, Impamyabumenyi y’ikirenga n’indi yitwa Ryangombe.

Muri iyi ndirimbo Ryangombe, Théo Bosebabireba ngo avuga uburyo nta yindi Mana ikwiye gusengwa Rurema wahanze Isi n’ibiyiriho byose.

Théo yageze i Burundi ku itariki ya 26 Kanama azagaruka mu Rwanda kuwa Gatatu tariki ya 17 Nzeri 2014.