Abasigaye mu irushanwa rya Big Brother Africa ya cyenda batunguwe no kumva inzogera zitanga umuburo w’inkongi y’umuriro yari igiye gufata inzu babamo bityo buri wese akiza amagara ye , bamwe basohotse bambaye ubusa.

Iyi nkongi yari igiye gufata iyi nzu ya Big Brother, ubwo bari mu mirimo itandukanye mu masaha ya mu gitondo cyo kuri uyu wa Gatatu.

Inzogera zimenyekanisha ko hari ikibazo cyavutse muri iyi nzu zikivuga, buri wese mu bahatana yakoze iyo bwabaga asohoka yihuse, abari ku meza bafata ifunguro barisize barirukanka, abari mu rwogero biyitaho basohoka uko bakabaye, abari baryamye bakangukiye mu bicu na bo bahunga iyi nkongi.

Nk’uko urubuga rwa Big Brother Africa rwabitangaje, bakimara kumva inzongera bihutiye gukiza amagara yabo maze Butterphly na Elikem bari mu rwogero basohoka bambaye ubusa, bahungira mu busitani bwo hanze. Ubwo izi nzogera zavugaga zibwira buri wese guhunga, Sheillah umuyobozi wabo muri iki cyumweru na we yabazengurukagamo abibutsa ko bagomba gusohoka.

Abasigaye mu irushanwa bose bigishijwe uko bagomba kwitwara mu gihe havutse ikibazo gitunguranye ndetse kuri iki kibazo cyari kivutse bose bagerageje kubyitwaramo neza nk’uko babitojwe. Icyaje kubatangaza nuko nta nkongi yari ihari ahubwo ni Biggie(Big Brother) wabikoze ku bushake agambiriye kureba uko buri wese yitwara mu gihe haba havutse ikibazo gitunguranye.

Bamaze kumenya ukuri kw’inzogera zavugaga, buri wese yasubiye muri gahunda ze maze Elikem yihutira gusubira mu rwogero dore ko yasohotse ntacyo yikinze ku bwo gukiza amagara ye.

Irushanwa kugeza ubu risigayemo Tayo(Nigeria), Ellah(Uganda), Sheillah (Botswana), Ma’am Bea(Ghana), Sipe (Malawi), Nhlanla( Afurika y’Epfo), JJ (Zimbambwe), Butterphly (Zimbambwe), Macky2(Zambia), Goitse(wo muri Botswana), Butterphly(Zimbabwe) na Idris(Tanzania)

Kuwa Mbere w’iki Cyumweru Biggie yongeye muri iyi nzu 12 basigaye mu irushanwa babamo abandi 10 banyuze muri Big Brother Africa mu myaka yatambutse barimo:
1. Denzel , 2. Elikem, 3. Feza, 4. Leonel , 5. Luclay, 6. Miss P, 7. Natasha , 8. Sulu, 9. Uti, 10. Vimbai.