Idris uhagarariye igihugu cya Tanzania muri Big Brother Africa ya 9 yahawe ibihano bigomba kumara amasaha 48 nyuma yo kuvuna rumwe mu nzugi z’inzu abahatana 19 babamo muri Afurika y’Epfo.

Iyi nzu aba basore n’inkumi babamo, iyoborwa na Big Brother ‘Biggie’ ndetse buri wese akaba asabwa kubahiriza amategeko aba yashyizweho hagira ukora ibinyuranye n’amategeko agahabwa ibihano na bagenzi be yananirana Biggie akifatira imyanzuro.

Umukobwa uhagarariye Ghana witwa Goitse na mugenzi we Samantha wa Afurika y’Epfo, mu minsi yashize bahawe ibihano bikomeye kubera ibyaha bakoze ku bwo kwica nkana amategeko agenderwaho muri iyi nzu. Kuri iyi nshuro hakurikiyeho Idris wo muri Tanzania wavunnye urugi bikababaza Big Brother.

Amaze guhabwa iki gihano byamuciye intege

Mbere yo guha igihano uyu Munyatanzaniya, Big Brother yahamagaye abahatana bose uko ari 19 basigaye mu irushanwa bahurira mu cyumba basanzwe bahererwamo amabwiriza. Yahise avuga ko Idris akwiye gucishwaho akanyafu ku bw’ikosa yakoze.

Biggie ati “Mu masaha 48 ari imbere ugiye kuba umukozi wa Biggie na HOH(Head Of House ‘uyoboye abahatana muri iki cyumweru’). Akazi uhawe kandi ugomba gukora neza ni uguteka, koza ibyombo, kuvoma no gukorera isuku bagenzi bawe. Ibi bihano uhawe bigiye guhita bitangira aka kanya. Ugomba kujya wita ku masahani n’ibindi bikoresho bya bagenzi bawe bikabikwa neza”

Biggie kandi yategetse Idris kujya ahora ateze amatwi yakumva ikivugirizo cya HOH cyangwa undi mugenzi we wese akihutira kumusanga ahantu ari ngo amenye icyo akeneye. Nubwo iki gihano kigoye ndetse bishobora kumugora kuba yabyubahiriza, Idris yasabwe kubikorana umutima mwiza bitaba ibyo ibihano bikaba byakwiyongera.

Nubwo Idris ahangayikishijwe n’ibihano yahawe hari bagenzi be 7 bahangayitse kumurusha ku bw’ibyago bafite byo kuba bamwe muri bo bazerekwa umuryango mu mpera z’iki cyumweru. Abo ni : Nkusi Arthur, Frankie, Kacey,Luis, Mr.265, Macky na Sheillah.

Abanyarwanda bose barashishikarizwa guha amahirwe Frankie Joe na Arthur kugira ngo bagume mu irushanwa. Bari mu cyiciro gikomeye ndetse bashobora kuzasezerwa ku Cyumweru nibadatorwa cyane. Kugira ngo ubahe amahirwe ukoresha uburyo butandukanye bwo gutora aribwo SMS, internet ndetse na Wechat.

Gutora ukoresheje Wechat ni ubuntu ndetse ukemerwa gutora inshuro 100 mu Cyumweru naho kuri SMS ujya ahandikirwa ubutumwa muri telefone yawe ukandika ijambo “vote” ugakurikizaho izina ry’uwo ushaka gutora ubundi ukohereza kuri 1616 kuri sosiyete iyo ari yo yose yaba Tigo, MTN na Airtel.

Gutora ukoresheje ubutumwa bugufi ni amafaranga 50 kuri sosiyete zose ndetse by’umwihariko gutora binyuze kuri Internet ubasha gutanga amahirwe inshuro ijana zose ku munsi.

Ku bifuza gutora bakoresheje internet, bikorerwa ku rubuga rwa DSTV. Kugirango ugere kuri urwo rubuga kanda HANO, hanyuma urebe urutonde rw’abakeneye amahirwe yawe, hanyuma uhitemo Frankie Joe, uri hasi ku ruhande rw’ibumoso.