Nyuma y’ibibazo n’amakimbirane yakuruye imirwano hagati ya Good Life n’uwahoze ari manager wabo Jeff Kiwanuka, Dr Jose Chameleone yakoresheje igitaramo mu rwego rwo kunga barumuna be n’abo bita abanzi babo.

Nk’uko ikinyamakuru The New Vision cyabitangaje, muri iki gitaramo cyabereye Kabalagala kuri Club Venom , Chameleone yari yatumiye barumuna be Pallaso na Weasel hamwe n’abahanzi batandukanye muri Uganda nka Bobi Wine, Radio n’abandi.

Ni nyuma y’ibitaramo Chameleone yari amazemo igihe ku mugabane w’u Burayi gusa akaba yarageze muri Uganda afite umutima wo kunga abavandimwe be bagiranye amakimbirane hagati yabo kugeza ubwo barwana mu makipe: Iya Radio(yari igizwe n’abantu bose bo muri Good Life), iya Jeff Kiwanuka(igizwe na Pallaso, AK47 n’inshuti zabo).

Chameleone yatunguye abari bitabiriye iki gitaramo ubwo yahekaga mu mugongo abasore bagize Good Life(Radio na Weasel) arangije abibutsa ko ikiruta ibindi byose ari uko bakunga ubumwe hagati yabo, bakirinda umuntu wese wabazanamo umwuka mubi.

Kugeza ubu, Good Life Crew igizwe na barumuna ba Chameleone, Weasle (Douglas Sseguya), Pallaso (Pius Mayanja) na AK47 (Emmanuel Mayanja). Hiyongeramo umuhanzi umwe utavukana na bo witwa Moze Radio ari na we wari izingiro ryo gufatana mu mashati guherutse kuba.

Icyababaje Chameleone ni uko Pallaso yanze kwitabira ubutumire. Pallaso wakoranye indirimbo na Good Life(bise Amaaso), yavuze ko adashobora kwemera guhurira mu gitaramo cyangwa mu kabari na Radio, Jeff atamuhaye uburenganzira.

Mu biganiro Radio yagiranye na Chameleone muri iryo joro, yavuze ko Jeff yifatanyije na Pallaso, AK47, Allan Kiwanuka n’inshuti zabo kugira ngo basenye Good Life. Yanavuze ko , uyu Jeff ahora asaba Weasel kumwiyomoraho, Good Life igahindura abayigize bityo Radio agashyirwa ku ruhande.

Chameleone, yavuze ko abafana barambiwe guhora bumva amakimbirane n’imirwano isigaye ihora mu bahanzi ba Uganda, ahubwo abasaba gukorera hamwe bakazamura umuziki wabo.