Ishyirahamwe ry’aba DJ muri Côte d’Ivoire ryafashe umwanzuro wo kutazongera gucuranga indirimbo zose zikoze mu njyana ya Coupé-Décalé biturutse ahanini ku itegeko ryashyizweho na Repubulika Iharanira Demokarasi ya Congo rikumira uyu muziki mu bitangazamakuru bya Leta.

Ikinyamakuru Koaci cyatangaje ko ishyirahamwe ry’aba DJs muri Côte d’Ivoire ryemeje ihagarikwa ry’umuziki ubyinitse mu buryo bwa Coupé-Décalé bidasubirwaho bihimura kuri RDC yawukomanyirije iwabo.

Umuyobozi w’ishyirahamwe ry’aba DJ muri iki gihugu, Dj Luciano yagize ati “Umuziki wo muri Congo twawuhagaritse hano. Aba DJ bose muri Côte d’Ivoire’ ntabwo bazongera kuwucuranga”

Repubulika Iharanira Demokarasi ya Congo ivuga ko uyu muziki wahagaritswe mu bitangazamakuru byose bya Leta ahanini mu rwego rwo kusigasira umuco w’igihugu ukomeje kwinjiriza n’uwo mu mahanga no kurushaho guteza imbere uwabo.

Ku mbuga nkoranyambaga za Facebook na Twitter muri Côte d’Ivoire hari gukorwa ubukangurambaga bwamagana Coupé-Décalé mu gihugu cyabo. Mu tubyiniro, utubari, inzu z’urunywero n’iz’imyidagaduro zose hashyizweho itegeko ko zitagomba gucuranga ubu bwoko bw’umuziki.

Imbyino ya Coupé-Décalé yaje bwa mbere muri Côte d’Ivoire mu mwaka w’2002, nyuma itangira gukwirakwizwa no muri Diaspora z’iki gihugu by’umwihariko mu baturage b’iki gihugu bari batuye i Paris mu Bufaransa. Uyu muziki kandi waje kwigarurirwa n’abahanzi bo muri RDC.