Abahanzi bamaze kwigarurira imbaga y’abafana muri Afurika, Davido na Diamond , ni bo bagomba kuririmba mu muhango ukomeye wo gutangiza Big Brother Africa igiye kuba ku nshuro ya 9.

Nk’uko AfricaMagic ibitangaza, mu ijoro ryo kuri iki Cyumweru tariki ya 05 Ukwakira 2014 nibwo uyu muhango utegerejwe na benshi uzafungurwa ku mugaragaro hanerekanwa bwa mbere abahatana 26 bagiye kumara iminsi 91 basangira ubuzima bwa buri munsi.

Abahanzi batatu bakomeye muri Afurika, Diamond(Tanzania), Davido(Nigeria) na Cassper Nyovest (Afurika y’Epfo) ni bo batoranyijwe kugira ngo bazasusurutse ibi birori.

Aba bahanzi bose uko ari batatu, bamaze kwegukana ibihembo bikomeye ku Mugabane wa Afurika gusa Davido ni we ubarusha ubushongore n’ubukaka mu muziki dore ko we yanegukanye igihembo cya Best International Act-Africa muri BET Award 2014.

Indirimbo nka ‘Dami Duro’, ‘Gobe’, ‘Skelewu’ , ‘Aye’, Number One Remix, Mdogo Mdogo, ‘Doc Shebeleza’ na Gusheshe’ (za Cassper Nyovest) ni zimwe mu zizaririmbwa mu buryo bwa live muri ibi birori bizaba bihanzwe amaso n’abakunzi ba Big Brother Africa hafi ya bose muri Afurika.

Irushanwa rya Big Brother Africa rizafungurwa ku mugaragaro kuri iki Cyumweru tariki ya 5 Ukwakira saa moya z’ijoro ku isaha yo muri Afurika yo hagati ihuriweho n’ibihugu Burundi, Botswana, Misiri, RDC, Libye, Malawi, Mozambique, Afurika y’Epfo, Zambia, Zimbabwe n’u Rwanda.

Nyuma y’uko inyubako ryagombaga kuberamo yahiye, habonetse indi rizaberamo iherereye i Johannesburg muri Afurika y’Epfo. Abanyarwanda Frank Joe na Nkusi Arthur ni bo bahagarariye u Rwanda muri BBA.

Ibi birori bizaba byerekanwa imbonankubone kuri AfricaMagic, AfricaMagic Entertainment, AfricaMagic World no kuri DStv ku197 n’198.

Ubwo Diamond na Davido baheruka kuririmbana muri MTV MAMA 2014: