Umuhanzi Diamond Platinumz yahishuye ko umukunzi we mushya Zari atwite ndetse iyi nda akaba yarayimuteye mbere y’uko bazana i Kigali mu mpera z’umwaka wa 2014.

Uretse kuba Diamond yatangaje iyi nkuru y’ugutwita k’umukunzi we abinyujije kuri Instagram, byinshi mu bitangazamakuru byo muri Uganda bimaze iminsi byandika ko bifite ibimenyetso simusiga ko uyu mugore atakijya mu mihango ari nacyo kimenyetso bashingiragaho bemeza ko atwite.

Diamond yashimangiye aya makuru y’ugutwita kwa Zari hassan Tlale abinyujije kuri Instagram ku gicamunsi cyo kuri uyu wa Kabiri tariki ya 13 Mutarama 2015. Yashyizeho ifoto y’ibizamini byo kwa muganga bigaragaza ko mu nda ya Zari hamaze kugeramo urubuto rwasaruwe ku rukundo rw’aba bombi.

Kuri iyi foto igaragaza ko Zari atwite umukobwa, Diamond yayiherekeje amagambo agira ati “Mfite amashyushyu yo kuzaguterura mu biganza byanjye…#Chibu Junior”

Hashize iminota mike ashyize kuri Instagram ubu butumwa, Diamond yahise abusiba ndetse avanaho n’iyi foto gusa abakunzi be bari batangiye kuyihererekanya na bimwe mu bitangazamakuru bihita bitahura ko Zari atwite nta gushidikanya.

Byatangiye gutangazwa ko Zari w’imyaka 34 atakijya mu mihango ku itariki ya 30 Ukuboza 2014 ubwo yari kumwe na Diamond i Kigali.

Diamond wiyemereye ko umukunzi we atwite aherutse kujya mu itangazamakuru ahanganye n’abakobwa yagiye akundana na bo barimo Penny na Wema, bavuga ko adafite ubushobozi bwo gutera inda.

Uyu mwana Zari atwite ni uwa kane agiye kwibaruka nyuma y’abandi batatu yabyaranye n’uwahoze ari umugabo we Ivan Ssemwanga.