Nyuma yo guhemukira abafana bitabiriye ibitaramo bye mu Bwongereza no mu Mujyi wa Stuttgart mu Budage bakamukubita abandi bagataha bamwijunditse, Diamond aherutse gukorera igitaramo muri Dodoma atenguha abafana kwihangana birabananira bamutera amabuye.

Ikinyamakuru Risasi Jumatano gitangaza ko iki gitaramo Diamond yagikoreye mu Mujyi wa Dodoma ahitwa Matei Lounge mu mpera z’icyumweru gishize. Icyaje kwatsa umuriro mu bufana no kubongerera uburakari n’uburyo bari baciwe amafaranga y’umurengera, Diamond n’abateguye igitaramo bakababihiriza kubera imyiteguro mibi yari yakozwe mbere.

Nasibu Abdul ‘Diamond’ akigera ku rubyiniro yaririmbye iminota itarenze 10 ibyuma bihita bizima ndetse biba ubugira gatatu. Muri izi nshuro eshatu zose ibyuma byazimye abatekinisiye bakoreshaga iminota byibuze 20 mu kubitunganya.

Abatekinisiye nibo batwaraga umwanya munini bahanzwe amaso n'abafana

Ku nshuro ya mbere bizima barihanganye ntibagira icyo bavuga, bimaze gukira Diamond yaririmbye igice cy’indirimbo imwe birongera birazima. Abafana batangiye kwijujuta, bamwe bateza imvururu bashaka uwateguye igitaramo ngo abasubize amafaranga yabo dore ko hashize iminota hafi 30 nta muziki bumva bategereje ko ibyuma bitunganywa.

Diamond na we byari byamutesheje umutwe

Hashize iminota 10 Diamond asubiye imbere y’abafana, ibyuma byarongeye birazima. Kwihangana kwabaye guke mu bafana, ab’imbaraga basatira urubyiniro bashaka gufata Diamond n’abateguye igitaramo ngo babahe isomo abandi batangira gutera amabuye n’ibyari igitaramo bihinduka akaduruvayo.

Mu minota mike bahise batunganya ibyuma Diamond araririmba , gusa hashize iminota 45 indangururamajwi uyu muhanzi yakoreshaga zashizemo amabuye na we afatwa n’umujinya atangira gutonganya nyir’igitaramo.

Abafana bategereje ko abatekinisiye bakemura ikibazo

Uko bamwe baburanaga bashaka gusubizwa amafaranga, ni nako abandi bavuzaga induru bahamagara Wema Sepetu.

Diamond amaze kurengwa n’umujinya yafashe ijambo agira ati “Ntabwo byumvikana, aka ni agasuzuguro gakomeye cyane. Uwateguye iki gitaramo ni muntu ki, yaciye abafana amafaranga menshi yarangiza akananirwa no kugura amabuye mashya ya micro?”

Kwinjira muri iki gitaramo byari amashiringi ya Tanzania 35,000 na 40,000 mu myanya y’icyubahiro.