Muri Gicurasi 2017 nibwo byamenyakanye ko Harmonize yatandukanye na Wolper bari bamaze igihe bakundana. Yahise amusimbuza umuzungukazi ukomoka mu Butaliyani witwa Sarah.

Wolper wari warimariyemo uyu musore batandukanye amushinja kumuca inyuma. Uku gutandukana kwakurikiwe n’intambara y’amagambo hagati y’aba bombi, iza no kwinjirwamo na Sarah wari wabatandukanyije.

Uburakari bwa Harmonize byatumye yiyemeza gushyira hanze urutonde rw’abasore 11 baryamanye na Wolper, barimo we ubwe, Diamond Platnumz, umuhanzi Jux n’abandi.

Uko Harmonize yarebanaga nabi na Wolper, ni ko urukundo rwe na Sarah rwagendaga rusagamba. Bakundaga kugaragara bari kumwe mu bitaramo bitandukanye ndetse bazanye mu Rwanda muri Werurwe uyu mwaka mu bitaramo bya The Mane.

Ikinyamakuru Global Publishers cyanditse mu mpera z’icyumweru gishize, ko mu gitaramo cya Wasafi Festival cyabereye ahitwa Iringa muri Tanzania, Harmonize na Wolper bemereye imbere y’abafana ko basubukuye urukundo rwabo.

Mu buryo bwatunguranye Harmonize yahamagaye Wolper ku rubyiniro, amupfukama imbere atangaza ko amugarukiye. Ati “Ndagira ngo mbivuga mu ruhame ko ngarutse kwa Wolper wanjye.”

Wolper nawe ntiyigeze ajijinganya, aramwemerara dore ko byasaga n’ibyapanzwe kuko bari banamaze iminsi bakururana.

Gusubirana kwa Harmonize na Wolper birashimangira ugutandukaka kwe na Sarah kwari kumaze iminsi guhwihwiswa. Hari hashize iminsi mike Sarah ashyize hanze ifoto imugaragaza atwite.

Harmonize yasubiranye na Wolper yari aherutse kwandagaza avuga abagabo yaryamanye nabo

Harmonize bari basigaye bagendana agatoki ku kandi