{Abaraperi bubatse izina ku Isi, Jay Z na Kanye West bo muri Leta Zunze Ubumwe za Amerika bahosheje amakimbirane n’umwiryane byari bimaze iminsi hagati y’abagore babo Beyonce na Kim Kardashian baniyemeza ko iyi miryango yombi igomba kongera kubana neza.}

Nk’uko Trace yabitangaje, ku wa Gatanu tariki 16 Mutarama 2015 nibwo Jay Z, Beyonce, Kanye West na Kim Kardashian bagaragaye mu Mujyi wa Los Angeles batembera ndetse bakaba barasangiriye muri resitora amafunguro ya nimugoroba.

Ibi byamamare byongeye guhura nyuma y’igihe kirekire havugwa amakimbirane n’umwiryane hagati ya Beyonce na Kim Kardashian ndetse umubano wabo mubi ukaza no guhungabanya ubucuti bw’iyi miryango yombi.

Amakimbirane y’aba bagore yatumye Jay-Z n’umuryango we badataha ubukwe bwa Kanye West na Kim Kardashian bwabaye mu mwaka ushize wa 2014.

Abagabo babo bamaze kubona ko umubano bafitanye udahwitse bafashe icyemezo cyo kwicarana n’abagore babo barabunga ndete kuri ubu ngo nta gatotsi kari hagati y’iyi miryango yombi nk’uko byari bimeze mu mezi yashize.

Umuzi nyir’izina w’ibibazo byavutse hagati ya Kim na Beyonce nturamenyekana gusa bamaze kurandura urwango bimika urukundo n’ubufatanye hagati yabo.

Iyi miryango yombi yiyunze nyuma y’amakuru aherutse gutangazwa ko Beyonce yaba atwite inda ya kabiri mu gihe Kim Kardashian na we aherutse kuvuga ko yifuza kubyara undi.