Justin Bieber yamenetse ingoma y’ugutwi kumwe ubwo yogeraga mu mazi ya pisine kuwa Gatatu tariki ya 24 Nzeri 2014.

Uyu muhanzi w’imyaka 20 amaze gukora iyi mpanuka abaganga be bagerageje kureba ikibazo yagize ngo bagikemure mu maguru mashya birabananira. Agiye mu baganga b’inzobere mu buvuzi bw’amatwi, bamubwiye ko ingoma y’ugutwi kumwe yamenetse ndetse bishobora kumugiraho ingaruka.

Mu kiganiro HollywoodLife yagiranye na Dr. Barry M. Rose umwe mu nzobere mu kuvura indwara z’amatwi ukorera mu bitaro bya California Pacific Medical Center biri i San Francisco, yavuze ko uyu muhanzi ashobora kubagwa ugutwi kumwe kugira ngo akire neza gusa ngo biragoye kuba yakira burundu kuko agace kangiritse kugasana bigorana.

Abinyujije kuri twitter, Justin Bieber yabwiye abafana be ko ahangayikishijwe n’iyi ngoma y’ugutwi kwe yamenetse gusa ngo ntibizamubuza gukomeza kubagezaho indirimbo nk’uko basanzwe.