Antoine Christophe Agbepa Mumba benshi bazi nka Koffi Olomide yatawe muri yombi na Polisi ya Repubulika Iharanira Demokarasi ya Congo ashinjwa gukwirakwiza ubutumwa buca intege imiryango mpuzamahanga iri guhangana n’icyorezo cya Ebola.

Nk’uko AFP ibitangaza, uyu muhanzi yatawe muri yombi i Kinshasa ku gicamunsi cyo kuwa Kabiri tariki ya 21 Ukwakira 2014. Ni nyuma y’uko inzego zishinzwe umutekano zifatanyije n’iz’ubuzima zamaganiye kure ibyapa byanditseho ngo “Vieux Ebola” byamamazaga ibitaramo bya Koffi Olomide i Kinshassa.

Iri zina rya “Vieux Ebola”, Koffi yarihimbwe n’abafana mu rwego rwo kurishyigikira no kubereka ko ntacyo rimutwaye yahise arishimangira ategura ibitaramo byitiriwe iri zina ari nayo mpamvu yamanitse ibi byapa i Kinshasa.

Ebola imaze guhitana abagera kuri 4,500 mu burengerazuba bwa Afurika naho muri RDC ikaba imaze kwica abagera kuri 49. Ibyo Koffi yakoze Leta y’iki gihugu ibifata nko gutiza umurindi iki cyorezo.

Colonel Pierrot Mwana-Mputu ushinzwe itangazamakuru n’itumanaho muri Polisi y’iki gihugu yagize ati “Ari kubazwa n’ubuyobozi kuko yiyerekanye nka (Vieux ‘) Ebola[Ebola ishaje] mu gihe turi guhangana n’iki cyorezo. Ni ukwerekana ko iki cyorezo nta ngufu gifite(…),uburyo ari gukoresha buca intege ubutumwa buri gutangwa bwamagana Ebola”

Umwe mu nshuti za hafiz a Koffi yabwiye iki kinyamakuru ko batemera umwanzuro Polisi yafashe ita muri yombi uyu muhanzi mu gihe abamwise iri zina bo badafungwa.

Mu minsi yashize Koffi Olomide yiyise Sarkozy, izina ry’uwahoze ari Perezida w’u Bufaranda, nyuma yiyise Papa Benedigito wa XVI(wasimbuwe na Papa Francis). Kiliziya Gatulika muri RDC yamaganiye kure uyu muhanzi imubuza kwiyita iri zina ry’umushumba wa Kiliziya Gatulika ku Isi.

Reba indirimbo Mutshiribara Koffi aherutse gushyira hanze: