Umuraperi Christopher Brian Bridges uzwi nka Ludacris n’umukunzi we Eudoxie basezeranye kuzabana akaramata nk’umugabo n’umugore.

Abo bombi barushinze nyuma y’uko tariki 26 Ukuboza 2014 Ludacris yari yasabye umukunzi we ko yamwerera akamubera umutima w’urugo undi na we ntiyazuyaje ahita abyemera.

Nk’uko TMZ yabitangaje, Ludacris na Eudoxie bakoze ubukwe nyuma y’ibyumweru bibiri amusabye ko bazabana ubuziraherezo.

Ku gicamunsi cy’umunsi w’ubukwe Ludacris yasohokanye n’umukunzi we muri imwe muri resitora zo muri Georgia maze ku mugoroba batashye umukobwa asanga umugabo yamuteguriye ikanzu y’ubukwe maze bahita basezeranira aho.

Ludacris yatangaje ko yasezeranye n’umukunzi we ku gicamunsi cyo kuri uyu wa Kabiri tariki ya 6 Mutarama 2015 abinyujije kuri Instagram, aho yashyize ifoto ye ari kumwe na Eudoxie bambaye imyenda y’abageni.

Byari ibyishimo bikomeye ku mukobwa kuko byari byateguwe nta ruhare abigizemo dore ko byose byamutunguye. Yari yasohokanye n’umukunzi we, batashye asanga nyina wa Ludacris yamaze kumuhitiramo ikanzu, bahita bambikana impeta.

Ludacris na Eudoxie bemeranyije kubana akaramata imbere y’inshuti ndetse na bamwe mu bagize imiryango yabo.

Nyuma y’ibi birori abageni bahise bajya kuruhukira muri Costa Rica ari naho bagomba kurangiriza ukwezi kwa buki.

Ludacris w’imyaka 37 yemeranyije kubana na Eudoxie w’imyaka 27 afite abana babiri yabyaye hanze.