Nyampinga w’igihugu cya Uganda mu mwaka wa 2013/2014 Stella Nantumbwe yamaze gutangaza ko yinjiye mu ruhando rwa muzika muri iki gihugu akaba azaririmba mu njyana ya RnB .

Ibi, Miss Uganda Stella Nantumbwe abitangaje mu gihe habura amezi make ngo atange ikamba rya Nyampinga agiye kumarana umwaka . Muri iyi minsi, uyu mukobwa akaba yumvikana mu ndirimbo nshya Journey y’umuhanzi Benezeri .

Uretse kuba yarakuze yiyumvamo impano kuba yahagararira igihugu cye no kumurika imideli ku rwego mpuzamahanga, Miss Uganda Stella Nantumbwe ngo kuva mu bwana bwe yakuze yiyumvamo kuzaba umuhanzi ukomeye .

Nyuma y’iyi ndirimbo Journey yakoranye na mugenzi we Benezeri, Miss Uganda Stella arateganya gukora indirimbo ze bwite ndetse akazashyira hanze album ye ya mbere mu mpera z’uyu mwaka nibimukundira nk’uko Bigeye yabitangaje .

Benshi mu baturage ba Uganda bari basanzwe bazi uyu mukobwa nka Nyampinga w’igihugu, batunguwe no kumva ko afite ijwi ryiza riryoheye amatwi mu ndirimbo . Hari ikindi gice cy’abanya-Uganda batavuze rumwe ku kwinjira mu buhanzi kwa Miss Uganda Stella Nantumbwe dore ko bemeza ko agiye mu muziki ashakisha uburyo yazakomeza kuvugwa nyuma yo gusimburwa .

Ku itariki ya 13 Nyakanga 2013 nibwo Stella Nantumbwe w’imyaka 22 y’amavuko yatorewe kuba Nyampinga w’igihugu cya Uganda atsinze abakobwa bagenzi be 22 . Amaze gutorwa yahembwe imodoka Mercedes Benz ‘A’ Class iherekejwe n’amashiringi ya Uganda 1,500,000 buri kwezi mu gihe cy’umwaka .