Iri rushanwa ryatangiye ku wa 9 Ugushyingo 2018, mu gihe uzegukana irushanwa azamenyekana ku wa 8 Ukuboza 2018.

Muri iki gihe cyose rimaze mu byiciro bitandukanye birimo kwerekana impano, kugaragaza ubumenyi n’ibindi, ntabwo Iradukunda Liliane uhagarariye u Rwanda yigeze ahirwa no kwegukana umwanya mwiza.

Kuri ubu yashyizwe mu bakobwa 25 bafite ubwiza bufite intego nyuma yo kwerekana umushinga wo kurwanya imirire mibi, ugashimwa n’abagize akanama katangaga amanota.

Muri iki cyiciro cy’ubwiza bufite intego, umukobwa wo muri Nepal witwa Shrinkhala Khatiwada ufite umushinga wo kubaka ibigo nderabuzima mu bice by’icyaro niwe wabaye uwa mbere.

Abakobwa baje imbere ni uwo muri Barbados, Brazil, Chile, u Bushinwa, Cook Islands, Guyana, Indonesia, u Butaliyani, Jamaica, u BUyapani, Kenya, Lebanon, Malaysia, Mexico, Mongolia, Myanmar, Nepal, New Zealand, Panama, u Burusiya, u Rwanda, Ecosse, Singapore, Trinidad & Tabago na Vietnam.

U Rwanda rumaze kwitabira iri rushanwa rya Miss World inshuro eshatu; mu 2016 hagiyeho Mutesi Jolly, 2017 hajyayo Iradukunda Elsa na Iradukunda Liliane waserukiye igihugu uyu mwaka.

Ubwo Mutesi Jolly yitabiraga nawe yaje mu bakobwa 24 bafite ubwiza bufite intego na Iradukunda Elsa ubwo yitabiraga aza muri batanu berekanye imico yabo neza muri Afurika.

Iri rushanwa riri kuba ku nshuro ya 68 ahitwa Sanya mu Ntara ya Hainan mu Bushinwa, ryitabiriwe n’abakobwa 122.

Umuhindekazi Manushi Chhillar w’imyaka 21 niwe wegukanye iri kamba umwaka ushize.

Iradukunda Liliane yashyizwe mu bakobwa 25 bafite ubwiza bufite intego

Shrinkhala Khatiwada wo muri Nepal niwe yabaye uwa mbere mu kugira umushinga mwiza

Miss Rwanda 2018 Iradukunda Liliane niwe wahagarariye u Rwanda muri Miss World