00:00:00 IGIHE NETWORK KN KINYARWANDA EN ENGLISH FR FRANCAIS

Ommy Dimpoz wariye uburozi, yongeye kuvuga ku burwayi bwatumye abikwa akiri muzima

Yanditswe na Muvunyi Arsène
Kuya 5 February 2019 saa 12:40
Yasuwe :

Umuhanzi wo muri Tanzaniya, Omary Faraji Nyembo [Ommy Dimpoz], yavuze ku burwayi bwe amaranye iminsi bwatumye abantu bakwirakwiza amakuru y’uko yitabye Imana kandi ari muzima.

Umwaka wa 2018 washaririye bikomeye Ommy Dimpoz. Muri kamena yafashwe n’uburwayi bwo mu muhogo ananirwa kumira amafungoro bituma ajya kubagirwa muri Afurika.

Muri Kanama yasubiyeyo agiye kureba niba yarakize neza, basanga haracyarimo ikibazo bituma bongera kumubaga. Abaganga bamubwiye ko ashobora kuba yaramize ibintu birimo uburozi.

Mu Ukuboza yongeye kuremba, ajya kwivuriza mu Budage nabwo yongera kubagwa ku nshuro ya gatatu. Yagarutse muri Tanzania mu ntangiriro za Gashyantare.

Mu kiganiro yagiranye n’umunyamakuru Millard, Dimpoz yavuze ko yagiye kwivuriza mu Budage nyuma y’aho yari yaratangiye kugenda agira ibibazo byo guhumeka.

Tariki 07 Ukuboza 2018 yinjiye mu iseta abaganga b’inzobere bamusatura inda bahereye munsi y’umukondo kugera hafi y’agatuza. Iki gikorwa cyamaze amasaha hagati y’umunani n’icumu.

Mu gihe yari mu bitaro hagiye havugwa amagambo menshi harimo n’uko yaba yashizemo umwuka nyuma biza kugaragara ko ari ibihuha.

Ommy Dimpoz yavuze ko n’ubwo uburwayi bwe bwari bukomeye atigeze agera aho gupfa nk’uko abantu bari batangiye kumubika.

Ati “Iyo wabazwe mu buryo bukomeye n’urugendo rwo gukira rufata igihe kinini no kugenda utangira nk’umwana muto uri kwiga ariko sinigeze mererwa nabi biteye ubwoba kugeza n’aho umuntu avuga ko Ommy yapfuye.”

Yavuze ko amakuru y’urupfu rwe yateje impagarara mu muryango we bitewe n’abantu batandukanye babahamagaraga babihanganisha.

Ati “Njyewe sinitekerezagaho nari ndi gutekereza ku muryango wanjye, nyogukuru wandeze. Ayo makuru yahangayikishije cyane abantu banjye ba hafi kuko barabihanganishaga kugera n’aho bampamagaye turebana kugira ngo bemere neza ko ndi muzima.”

Kuri ubu Ommy Dimpoz yavuze ko ameze neza, uretse ko abaganga bamubwiye ko bazakomeza kumukurikirana kugeza akize burundu.

Ijwi rye ryaragarutse ndetse yemeza ko ubu afite ubushobozi bwo kongerera kuririmba n’ubwo ubu yabanje kwiyitaho kuruta uko yahita yirukira mu muziki.

Akiva muri mu Budage yahise ashyira hanze indirimbo yise ‘Ni Wewe’ yakoze mbere y’uko ajya kwivuriza mu Budage, aho aba ashima Imana yamufashije kuvu ku iseta inshuro ebyiri zose yabagiwe muri Afurika y’Epfo.

Ommy Dimpoz yashegeshwe n'uburwayi bwaturutse ku burozi
Ommy Dimpoz yabanje kubagirwa muri Afurika y'Epfo
Ommy Dimpoz mbere y'uko arwara, yari umusore w'intarumikwa
Ommy Dimpoz yemeje ko ubu ameze neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .