Peter Okoye wo muri P Square yahanutse ku rubyiniro ubwo P Square yaririmbaga mu gitaramo cyiswe Triple 9 Concert cyabereye muri Nigeria mu ijoro ryo kuwa Kabiri rishyira kuwa Gatatu tariki ya 1 Ukwakira 2014.

Itangazamakuru ryo muri Nigeria ryavuze ko uyu muhanzi yakoze iyi mpanuka ubwo we na mugenzi we Paul baririmbaga iyo bise ‘Bring it on’, imwe mu ndirimbo zigize album yabo nshya ‘Double Trouble’.

Peter ukunda kubyina yigana Michael Jackson akimara guhanuka ku rubyiniro mu nzu y’imyidagaduro yitwa Landmark Event Centre, abashinzwe umutekano bahise bamuterura bamusubiza ku rubyiniro arihangana akomeza kuririmba.

Uyu muhanzi yaje kujyanwa mu bitaro kubera imvune yagize mu mugongo ari na wo yakubise ku byuma bitandukanya abafana n’urubyiniro.

Nyuma yo kugwa hasi aririmba, P Square yanditse kuri Instagram agira ati “Naguye ku rubyiniro kandi ntabwo byari bisekeje….Nk’uko nkunda kubivuga, ntuzubuke umutwe wawe na rimwe, komeza uhagaze ushikamye. Nzakomeza mbikore. …..ubu twerekeje ku bitar. Ndabakunda mwese”

Peter akoze iyi mpanuka mu gihe we na mugenzi we Paul bitegura kujya gukorera igitaramo i Lubumbashi . Biteganyijwe ko P Square izagera mu Mujyi wa Lubumbashi kuwa Gatanu tariki ya 03 Ukwakira hanyuma kuwa Gatandatu tariki ya 04 Ukwakira 2014 bakore igitaramo kizabera kuri stade ya Lubumbashi.

Ibi bitaramo P-Square iri gukora muri iyi minsi ni mu rwego rwo kwamamaza no kurushaho kumenyekanisha album yabo nshya bise Double trouble.