Diaspora Nyarwanda ya Namur mu Bubiligi, mu mpera z’icyumweru gishize yateguye umunsi w’imyidagaduro n’umuco, mu rwego rwo guhuza Abanyarwanda n’abanyamahanga batuye mu Bubiligi, hifashishijwe imikino y’amaboko (Basketball) n’umupira w’amaguru ukinirwa mu nzu (mini-foot).

Ku wa gatandu tariki ya 13 z’ukwezi kwa Nyakanga 2013, hateguwe amarushanwa kugira ngo amakipe ya mbere ahabwe ibikombe, ndetse n’inryo za kinyarwanda kugira ngo ubusabane burusheho kugenda neza no kwiha agaciro nk’Abanyarwanda baturutse impande zose.

Iyo mikino yitabiriwe n’amakipe aturutse mu mpande zose z’u Bubiligi, ndetse n’abashyitsi b’ingeri zose harimo n’abaturutse hanze y’u Bubiligi.

Iyo mikino yitabiriwe Diaspora ya Liège, Intare FC ya Diaspora ya Bruxelles, amakipe ya Diaspora ya Namur, inshuti z’u Rwanda nka Burundi Sport FC ya Bruxelles ari na yo yatahukanye igikombe cy’ikipe ya mbere mu mupira w’amaguru. Na ho mu mukino w’amaboko, ikipe ya Namur ni yo yatwaye igikombe cya mbere.

Mu bashyitsi b’imena bitabiriye iyo myidagaduro, barimo Burugumesitiri w’umujyi wa Namur (Maxime Prévot), Umunjyanama wa kabiri wa Ambasade y’u Rwanda mu Bubiligi (Uwamungu Joseph), uhagarariye Minisitiri w’ubuzima wa Région Wallonne, umuyobozi wa Diaspora mu Bubiligi (Nyinawase Pulchérie), n’abandi bayobozi ba Diasopora nyarwanda mu tundi turere two mu Bubiligi.

Mu magambo yavuzwe n’abashyitsi, bishimiye cyane uburyo abanyarwanda bakora ibikora byiza bihuza urungano rwose, ndetse banabizeza ko bazajya bashyigikira ibyo bikorwa kuko bifitiye abaturage akamaro kanini.