Baguma Sebabi wahize abagabo bose mu bubi muri Uganda yashyize hanze amashusho y’indirimbo mu rwego rwo kugaragaza ko ashyigikiye Nyampinga w’iki gihugu uherutse gutorwa ariko benshi bakamwamagana bavuga ko adakwiye ikamba bamushinja kugira uburanga buke.

Mu gufata amashusho y’iyi ndirimbo Baguma Sebabi yise “Abagala Sebabi” ngo yagendeye ku bitekerezo yahawe na Miss Uganda 2014 Leah Kalanguka amutera ingabo mu bitugu kugira ngo bahangane n’Abanya-Uganda batamwishimiye.

Sebabi na Miss Leah Kalanguka baramagana abarwanya abantu badafite uburanga bifuza

Baguma Sebabi yabwiye BigEye ko iyi ndirimbo ye ifite intego yo kumvisha Abanyagihugu ko kuba batora umukobwa uhiga abandi mu bwiza hari n’abandi baba bahiga abandi mu bubi ndetse abo bombi bakaba bakwiye guhabwa agaciro kangana. Iyi ndirimbo ngo Baguma Sebabi yayikoze mu izina ry’Abanya-Uganda bamugwa mu ntege mu bubi.

Leah Kalanguka w’imyaka 23 y’amavuko ni we watorewe kuba Miss Uganda umwaka wa 2014/2015 gusa nyuma yo gutorwa kwe benshi mu banyagihugu bamwamaganiye kure bavuga ko adakwiriye kwitwa Nyampinga w’igihugu cyabo.

Uyu mukobwa yegukanye iri kamba ahigitse bagenzi be 19 mu birori byabereye kuri Speke Resort Munyonyo mu ijoro ryo kuwa Gatandatu tariki ya 25 Ukwakira.

Babinyujije ku mbuga nkoranyambaga za Facebook na Twitter benshi bagiye bavuga amagambo agaragaza ko batamwishimiye na gato ndetse bahata ibibazo abateguye iki gikorwa ku bwo kuba barahisemo umukobwa mubi udakwiriye kwitwa Miss Uganda.

Sebabi asanzwe ari umuhanzi w'indirimbo muri Uganda

Baguma Sebabi yarushinganye na Caroline muri Mata 2013, kuri ubu bafitanye abana batatu. Uyu mugabo utewe ishema no kuba bamufata nk’uyoboye abandi mu kugira amasura atari meza ni umuhanzi, akaba umunyarwenya w’umuherwe muri Uganda.