Jaguar ubarirwa mu baherwe muri Kenya yabwiye Mseto East Africa ko yamaze gufata umwanzuro wo kuziyamamaza ndetse ngo arashaka kuzahagararira agace kitwa Starehe mu Nteko Ishinga Amategeko.

Uyu muririmbyi watangiye gukora ubukangurambaga mu baturage no gushakisha amajwi mu buryo bukomeye azaba ahanganye n’abandi bakandida nabo bafite amazina akomeye barimo Boniface Mwangi, umucuruzi witwa Steve Mbogo ndetse na Maina Kamanda.

Uwitwa Mwangi azaba ahagarariye ishyaka riherutse gushingwa ryitwa Ukweli party , Steve Mbogo azaba ari ku itike ya ODM mu gihe Jaguar na mugenzi we Maina Kamanda bazaba bahatanye mu izina ry’ishyaka Jubilee party.

Mu Mujyi wa Nairobi hari umwuka wumvikanisha ko Jaguar ashobora kuzinjira mu Nteko Ishinga Amategeko yemeye kuko abayobozi mu nzego z’ibanze muri Starehe barashaka ko uyu muhanzi ahagararira aka gace ndetse ngo n’abaturage baramwifuza cyane bishingiye ahanini ku bikorwa yakoze.

Mu muryango yashinze witwa Jaguar foundation, uyu muririmbyi yigishije urubyiruko kwihangira imirimo ndetse hari amashyirahamwe yashinze yo koza imodoka anayaha ibikoresho bigezweho bibafasha gutangira ubuzima, ubu bafite ubuhamya bukomeye ku mirimo ya Jaguar. Yanubakishije ibirori, yatanze ibiribwa ku batishoboye.

By’umwihariko Jaguar ashimirwa ko yazahuye ubuzima bw’urubyiruko rwo mu kajagari ka Mukuru. Ibikorwa yakoze biciye muri uyu muryango yashinze byatumye yigarurira imitima ya benshi mu gace ka Starehe.

Jaguar aherutse gusezera ku kazi ka leta yari yahawe na Perezida Uhuru Kenyatta usanzwe ari inshuti ye ikomeye, icyo gihe yavuze ko abivuyemo ‘biturutse ku mpamvu bwite’ ze.

Muri Mata 2015, Jaguar yari yahawe imirimo mu nama y’ubutegetsi y’Ikigo cy’Igihugu gishinzwe kurwanya ikoreshwa ry’ibiyobyabwenge muri Kenya (Nacada). Kuva icyo gihe ubwo uyu muririmbyi yahabwaga izo nshingano yise ku rubyiruko rwo muri Kenya ndetse bamwe babivaho burundu.

Jaguar yemeje ko ashaka kwinjira muri politiki mu buryo bweruye nyuma y’uko hari abandi bahanzi bo muri Tanzania bahataniye imyanya mu butegetsi mu mwaka wa 2015. Icyo gihe Professor Jay yatorewe kuba Depite w’agace ka Mikumi ko mu Ntara ya Morogoro, ari na ko yavukiyemo, yinjiranye mu Nteko Ishinga Amategeko n’umuraperi mugenzi we Joseph Mbilinyi [Sugu], umwe mu batangije Hip Hop muri Tanzania.