Britney Spears yageze muri Israel ku Cyumweru tariki ya 2 Nyakanga 2017 bucyeye bwaho aririmbira mu Mujyi wa Tel Aviv ahitwa Yarkon Park, igitaramo cye cyitabiriwe n’abafana 55,000.

Uyu muhanzi w’imyaka 35 yagiye muri Israel avuye mu rugendo rw’ibitaramo yari amaze iminsi akorera muri Aziya gusa yageze muri iki gihugu ibintu bihindura isura ndetse imirimo imwe irahagarara kubera uburyo abaturage bari bashishikajwe no kwirebera Spears.

Variety yatangaje ko Britney Spears akigera muri Israel yahise ajya gusura igice gifite amateka akomeye cya Yeruzalemu aho Yezu yavukiye, mu nzira agana kuri ubu butaka butagatifu yahuye n’isinzi ry’abafana, abanyamakuru n’abafotozi batabarika, bamwuzuyeho bituma agerayo bitinze cyane ndetse bimuviramo gusubika gahunda zimwe yagomba gukora mbere y’igitaramo.

New York Post yatangaje ko Britney Spears yasubitse ibiganiro yagombaga kugirana na Minisitiri w’Intebe wa Israel Benjamin Netanyahu ndetse gahunda yo gusura abarwayi ba kanseri yagombaga gukora uwo munsi nayo yahise yimurwa.

Nubwo byatangajwe ko Britney Spears yasubitse ikiganiro yagombaga kugirana na Benjamin Netanyahu kubera abafana, ubuvugizi bw’ibiro by’uyu muyobozi bwatangaje ko ‘icyo kiganiro na Spears cyari kitaremezwa’ bya burundu.

Urugendo rwa Britney Spears muri Israel rwatumye ubuyobozi bw’ishyaka ritavuga rumwe n’ubutegetsi Labour Party [Parti travailliste] risubika igikorwa cy’amatora y’ubuyobozi bwaryo kubera ko cyahuriranye n’uko abaturage bashishikajwe n’uyu muhanzi kurusha ibindi byose.

Britney Spears ari mu bahanzi bake bakoreye igitaramo mu Mujyi wa Tel Aviv kikitabirwa n’abantu benshi, yaje inyuma ya Michael Jackson [yagikoreyeyo abona ibihumbi 100], Madonna [yabonye ibihumbi 80] mu gihe Rihanna yabonye 52.

Britney Spears yakiriwe n'abafana ibihumbi

Bamweretse ko bamukunda ku kigero cyo hejuru

Ku wa Mbere w'iki Cyumweru, Britney Spears yakoreye igitaramo i Tel Aviv