Umuhanzi Justin Bieber ni we uyoboye urutonde rw’ibyamamare ku Isi batarengeje imyaka 30 byinjije akayabo mu mwaka wa 2014 nk’uko bigaragazwa na Forbes Magazine, isanzwe izwiho gukora intoned cyane cyane iz’abaherwe mu byiciro bitandukanye.
Nubwo Justin Bieber ari mu byamamare bya mbere bivugwa mu bibazo, amanyanga n’ubuhemu, kuva muri Kamena 2013 kugera muri Kamena 2014 ni we winjije amafaranga menshi kurusha ibindi byamamare bitarengeje imyaka 30 y’amavuko.
Forbes igaragaza ko, Justin Bieber yinjije miliyoni 80 z’amadorali kuva muri Kamena 2013 kugeza muri Kamena 2014. Amafaranga menshi uyu musore w’imyaka 20 yayavanye mu bitaramo yakoze azenguruka ibice bitandukanye byo ku Isi yise ‘Believe’.
Nyuma y’album Justin yise ‘Journal’ ntabwo yongeye gushyira ingufu cyane mu muziki gusa kuri ubu afite indirimbo nshya azaba afatanyije na Cody Simpson ndetse ngo ishobora kongera kumuzamura mu buryo bukomeye kubera ingufu aba bombi bayishyizemo.
Ku mwanya wa kabiri haje itsinda rya One Direction, riherutse kwegukana ibihembo byinshi muri American Music Awards 2014, ryinjije miliyoni 75 z’amadorali. Taylor Swift ari ku mwanya wa gatatu akaba yarinjije miliyoni 64 z’amadorali.
Urutonde rw’ibyamamare bitarengeje imyaka 30 byinjije akayabo muri 2014:
1. Justin Bieber w’imyaka 20: Yinjije miliyoni 80 z’amadorali
2. One Direction (bafite imyaka 21 ushyize ku mpuzandengo): Yinjije miliyoni 75 z’amadorali
3. Taylor Swift w’imyaka 24: Yinjije miliyoni 64 z’amadorali
4. Bruno Mars w’imyaka 29: Yinjije miliyoni 60 z’amadorali
5. Rihanna w’imyaka 26: Yinjije miliyoni 48 z’amadorali
6. Miley Cyrus w’imyaka 22: Yinjije miliyoni 36 z’amadorali
7. Jennifer Lawrence w’imyaka 24: Yinjije miliyoni 34 z’amadorali
8. Lady Gaga w’imyaka 28: Yinjije miliyoni 33 z’amadorali
9. Avicii w’imyaka 25: Yinjije miliyoni 28 z’amadorali
10. Skrillex w’imyaka 26: Yinjije miliyoni 18 z’amadorali
TANGA IGITEKEREZO