Mu butumwa uyu muherwekazi yashyize ku rubuga rwa Instagram ku munsi w’amavuko Ssemwanga, yavuze ko adateze kwibagirwa uyu mugabo babanye bakanabyarana abana batatu kuko aho ari hose aba yiyumvamo ko ari hafi ye.

Ati “Uyu munsi wari kuba wujuje imyaka 41 ariko Imana yari ifite indi migambi, yego twarakubuze mu buryo bugaragarira amaso ariko mu buryo bw’umwuka turi kumwe.”

Yakomeje ati “Nkurebera mu bahungu twabyaranye niyumvamo ko uhari ahantu hose ndi. Umurage wawe uracyahari. Komeza uruhukire mu mahoro kugeza igihe tuzahurira.”

Ivan Semwanga yari umunyemari uzwi cyane muri Uganda gusa izina rye ryashinze imizi muri Afurika y’Uburasirazuba ahanini kubera urukundo rwe na Zari n’uruhare yagize mu iterambere rya Uganda mu buryo butandukanye.

Yitabye Imana ku wa 25 Gicurasi 2017, yaguye muri Afurika y’Epfo azize indwara yo guturika imitsi yo mu mutwe. Ashyingurwa muri Nyakanga 2017.

Nyuma y’urupfu rwe Zari mu bihe bitandukanye yagiye agaragaza ishavu yasigiwe n’uburyo uyu mugabo wamusigiye abana batatu yapfuyemo akenshi akajya kuririra no kumva ye.

Zari yabyaranye na Ssemwanga abana barimo uwitwa Quincy, Raphael na Pinto. Barushinze mu 2011 ariko urukundo rwabo ntirwaramba kuko mu 2014 zari yahise yikundanira na Diamond Platnumz, ubu na we batandukanye bafitanye abana babiri.