Umuhanzi Masamba Intore yatangije gahunda yo kuzajya aririmba buri wa Gatanu kuri Hotel Mille Collines, guhera saa kumi n’ebyiri z’umugoroba (18h00’), aho kwinjira biba ari ubuntu.

Ibi bitaramo biri mu rwego rwo kugarura umuco gakondo no kwibutsa Abanyarwanda ko iby’iwacu biruta kure iby’ahandi nk’uko Masamba yabibwiye IGIHE.

Muri ibi bitaramo Masamba aba ari kumwe n’abacuranga inanga nka Daniel Ngarukiye na Jules Sentore, abacuranga imiduri n’abahanzi baririmbana indirimbo gakondo.

Soma ikiganiro kirambuye yagiranye na IGIHE:

Masamba aririmba muri Mille Collines zimwe mu ndirimbo ze zakunzwe

IGIHE: Watubwira kuby’ibitaramo gakondo watangije?

Masamba: Ni gahunda nshya twatangije yo kujya turirimbira buri wa gatanu, kuri Mille Colline, muri Happy Hour (saa kumi n’ebyiri z’umugoroba (18h00’) kugeza saa tatu z’ijoro (21h00’) tukaba tuzanajya no mu yandi mahoteli makuru makuru nka za Lemigo na Serena na Gorilla.

IGIHE: Icyo gitekerezo se mwagikuye he?

Masamba: Nasanze ibintu bijyanye na gakondo Music birimo bikembera, umuco ugenda utakara abantu bagana ku kuba Abanyamerika n’Abanyaburayi bigatuma umuco wacu ushobora gutakara kubra ko dushima ibyo hanze kurusha iby’iwacu. N’itangazamakuru, usanga riba ryereka urubyiruko cyane cyane ibyo hanze bityo bakaba bashobora kwibwira ko ari byo byiza kurusha iby’iwacu kandi nta mahuriro.
Gakondo rero nayitangije ije gusigasira umuco nyarwanda, icya kabiri ni ukugira indangagaciro zacu nk’Abanyarwanda. Ikindi ni ugusohoka tukerekana indi sura itari iyo isi ituziho, benshi batuziho isura ya Jenoside ariko u Rwanda rufite ibindi bintu byiza bitari Jenoside. Ibyo byose ntituzabikora tukirebera ku muco w’ahandi, aho niho gakondo yavutse twongera tugarura umuco wo gukoresha ibicurangisho gakondo harimo inanga, umuduri n’ibindi.

IGIHE: Ese muririmba izihe ndirimbo muri ibyo bitaramo?

Masamba: Turirimba indirimbo nyarwanda gusa, nta n’izindi njyana. Turirimba indirimbo nyarwanda 100%.
IGIHE: Muririmbana na ba nde?
Masamba: Ikipe igizwe n’abantu basanzwe bamenyerewe mu njyana gakongo barimo njyewe Masamba, Daniel Ngarukiye, Jules Sentore, Manu,Ngabo Michael, harimo Sophia, n’umusaza witwa Tamfum na Didier ucuranga gitari (Basse).

Abahanzi bafatanya na Masamba kuririmba Gakondo

IGIHE: Muririmba izihe ndirimbo?

Masamba: Turirimba ziriya zijyanye n’umuco zirimo “Nzajya Inama Na Nde”, “Wirira”, “Inka Ni Iy’Urukundo”, “Ziravumera”, “Ari Hehe”, mbese izanjye zose.
Turirimba kandi n’iza Jules Sentore, inanga za Daniel, hanyuma hakabamo no gusubiramo indirimbo za kera nka “Ibare”, “Benimana”, “Impangaza” n’izindi.
IGIHE: Muzabikora gute ngo mugarure mu banyarwanda umuco wogucuranga umuduri, inanga n’ibindi bicurangisho nk’ibyo?
Masamba: Dufite gahunda yo kwegera Abanyarwanda tukagarura igitaramo nyarwanda. Dufite gahunda yo kwigisha imbyino gakondo, kwigisha indirimbo nyarwanda no kugarura gucuranga ibicurangisho gakondo nk’inanga, imiduri, icyembe n’ibindi.
Dufite kandi na gahunda yo kuzenguruka u Rwanda twigisha ibyacu bya gakondo.
Nyuma rero turateganya no gutangiza itangwa ry’ibihembo ku bahanzi bakora injyana gakondo ari byo twise “Gakondo Award” mu mpera za Nyakanga; iyo niyo migambi duteganya.

IGIHE: Ese ni bande babatera inkunga kugira ngo mubashe kubigeraho?

Masamba: Ubu turimo turavugana n’abaterankunga, kugeza ubu ni twe tucyitera inkunga ariko dufite bamwe batangiye kudutera inkunga.

Bamwe mu bahanzi b'igitsina gore baba bari kumwe na Masamba mu bitaramo bya Gakondo yatangije

IGIHE: Ni ikihe cyifuzo wifitemo muri wowe wifuza kuzageraho nyuma yo gutangiza iyi gahunda yo kugarura umuco gakondo?

Masamba: Icyo twifuza ni ukugira abahanzi bayoboka iyi nzira y’indirimbo z’iwacu kandi benshi bamaze kumenya agaciro kabyo banatangiye gukora gakondo nka Mani Martin, Patrick Nyamitali, Samputu, Liza hari n’abandi turimo tuganira barimo bansaba uko nabereka inzira y’uko babijyamo kubera ko mbifitemo uburambe. Nibyo byonyine byatuma umuntu atumirwa mu maserukiramuco yo hanze.
Kugira ngo userukire igihugu ugomba kuba ufite iby’iwanyu kandi nakunze ko biri kugenda bigira imbaraga kuko byari bimaze iminsi bisinziriye. N’izi serukiramuco ziri kuza JAMAFEST, FESPAD byahaye isomo abantu ko gukunda iby’iwanyu bishobora kukugeza ahantu kure.

Sentore na bagenzi be baririmba indirimbo gakondo kuri Mille Collines mu gushyigikira Masamba

IGIHE: Ni iki wasoza ubwira abafana ba Masamba, n’abakunda umwimerere wa gakondo?

Masamba: Twasabaga abantu ko bazajya baza kuri Mille Colline buri wa gatanu saa kumi n’ebyiri.bityo duseke, dutarame, dushyenge, twishime.