Fally Ipupa mu rwego rwo gufasha abaturage bo mu mujyi wa Goma muri Repubulika iharanira Demokarasi ya Kongo bugarijwe n’ubukene, yateguye umukino wa gicuti uzitabirwa n’abakinnyi bakomeye bakomoka k’umugabane wa Afurika ndetse n’igitaramo azakora. Muri abo bakinnyi harimo: Drogba, Emmanuel Adebayor na yaya Touré.

Nk’uko bitangazwa n’urubuga DirectCD, ruvuga ko uretse iki gikorwa cy’urukundo Fally Ipupa agiye gukora muri Afurika ndetse no muri Kongo, ngo yahimbye n’indirimbo 2 zivuga ku ubumuntu, muri zo hakaba harimo imwe yageneye abagore babana na Virus itera SIDA , indi ikaba yarayifatanyije n’abandi bahanzi nka “Passi” na “Jacob Desvarieux”.

Mu gitaramo yateguye nyuma y’umukino, Fally Ipupa azaboneraho kumenyekanisha Alubumu ye nshya yise “Power, Kosa leka” amaze amezi abiri ashyize hanze ifite indirimbo zikomeje gukundwa na benshi muri kino gihe, zirimo : “Ndoki “, “Amour assassin”, “Bruce” ndetse na “Service”.

Fally Ipupa, umuhanzi ukomoka muri Repubulika iharanira Demokarasi ya Kongo, yamenyekanye cyane mu ndirimbo nka “Effescence”, “Hustler is Back” n’izindi nyinshi.

Ku itariki ya 21 na 22 Kamena 2013, aba bakinnyi bakazanagurisha imyenda yabo bakinana n’inkweto, nyuma hagakurikiraho igitaramo kizishyuzwa, abakitabiriye bakaboneraho umwanya wo kuramutsa ibi byamamare muri ruhago, ibi byose ngo biri mu rwego rwo gukusanya inkunga yo gufasha abaturage b’ i Goma bugarijwe n’ubukene n’ibindi bibazo.

Reba indirimbo "Ndoki" ya Fally Ipupa.