Ku nshuro ya kabiri hateguwe igitaramo cyo kwibuka abahanzi bazize Jenoside yakorewe Abatutsi mu 1994. Kuri uyu wa gatanu tariki ya 14 kamena nibwo hateganyijwe icyo gitaramo. Kikazabera kuri stade Amahoro mu igicumbi cy’umuco , kizatangira saa kumi n’imwe z’umugoroba, kwinjira bikazaba ari ubuntu.

Iki gitaramo cyateguwe na Ingoma Music Association ifatanyine na Ministeri y’umuco na Sport, akaba ari ku nshuro ya 4 hibutswe abahanzi bazize Jenoside ariko bikaba ku nshuro ya 2 hakozwe igitaramo cyo kubibuka kuko mu yindi myaka babibukiraga ku Rwibutso rwa Jenoside rwa Gisozi.

Nk’uko byagenze umwaka ushize, iki gitaramo kizongera kibere ku Gicumbi cy’umuco kuri Stade Amahoro i Remera, kikaba kizitabirirwa n’imyiryango yasizwe n’abo bahanzi, aba ministre ndetse n’abahanzi batandukanye.

Abahanzi bazibukwa bagera kuri 54, aho twavugamo nka Rugamba Cyprien, Sebanani André, Bizimungu Dieudonné n’umufasha we Uwimbabazi Agnes, Karemera Rodrigue, Niyigaba Vincent, Sekimonyo Emmanuel ,Twagirayezu Cassien, Bizimana Ruti na Gedeon Condo .

Muri iki gitaramo hakaba hazacurangwa mu buryo bw’umwimere (live) indirimbo z’abo bahanzi bazize Jenoside ya 1994, hatumiwe amatorero atandukanye nk’Amasimbi n’Amakombe, urekerereza ndetse na Orchestre Impala izaba yahasesekaye.
Umuyobozi wa Ingoma Music Association Jean Pierre Runyurana,yatangarije IGIHE ko akangurira abanyarwanda bose harimo n’abahanzi kuza kwifatanya nabo kwibuka abo bahanzi bagize uruhare runini mu guteza imbere ubuhanzi nyarwanda, biyumvira indirimbo basize bahanze n’ubu zigikunzwe cyane.

Umuhanzikazi Agnes

Karemera Rodrigue

Sebanani

Twagirayezu

Rugamba Cyprien