Iki gitaramo cyabereye muri Kigali Conference and Exhibition Village (KCEV), ahazwi nka Camp Kigali, ku wa 25 Mutarama 2025.

Bamwe mu bazwi basezeye Ibihame by’Imana bakerekeza mu ‘Ishyaka ry’Intore’ ryakoze igitaramo cyishimiwe barimo Cyogere Edmond, Mucyo w’Icyogere, Gatore Yannick na Ruti Joel.

Bahuriye mu gitaramo cyiswe “Indirirarugamba’’. Uyu wari umutwe w’Ingabo wabayeho ku ngoma y’Umwami Cyilima Rujugiro, wiganjemo abana bato n’urubyiruko.

Bivugwa ko icyatumye baba Indirirarugamba ari uko bagiye ku rugamba igihe cyabo kitaragera kuko bari bakiri bato ariko bari bafite imyitozo ihagije kuko bitozaga cyane. Gusa kuko u Rwanda rutoherezaga abana mu rugamba, igihe kiragera ruraterwa, rusumbirijwe biba ngombwa ko ba bana bajyanwa ku rugamba kubera amaburakindi. Aba bana bagezeyo baba intwari ari na byo ‘Ishyaka ry’Intore’ bakinnye.

Iki gitaramo cyatangiye Ishyaka ry’Intore bishyize mu mwanya w’ingabo zatumweho n’Umwami kuko hari abana b’Indirirarugamba, bari mu itorero bamurikaga aho bageze.

Igitaramo kigeze hagati umwami yakira amakuru avuye ku mutasi we bita Nkundumwami avuga ko u Rwanda ruri hafi guterwa n’ibihugu by’abaturanyi. Amaze kwakira ayo makuru ni ko kwegeranya ingabo kugira ngo zitegure.

Cyogere Edmond uri mu bayobozi bakuru b’Ishyaka ry’Intore yabwiye IGIHE ko yavuze ko ari ibintu bakinnye bakurikije aya mateka.

Ati “Iriya mikino njyarugamba mwabonye ni abana bitozaga kugira ngo bazamenye uko bazitwara bahagarariye u Rwanda. Ni bwo byaje kurangira tugarutse turarwana tuza kuvuga amacumu, twerekana uko urugamba rwagenze twegukanye intsinzi.”

Yakomeje avuga ko batangira byari ibintu bikomeye ariko bakihangana.

Ati “Iyo utegura ibi bintu ubwoba ntibwabura ariko na none iyo uzi ko ibintu utanga ari byiza bikurema agatima, ukaba uzi ko n’abantu batangiye kudushyigikira kuva kera. Ushingiye ku byamamare mwabonye, ibinyamakuru, uwo twageragaho wese akitaba karame. Niyo mpamvu twavuze ngo turashyigikiwe ahubwo ni ahacu ho kwitegura uru rugamba.”

Yavuze ko babanje gushyira hanze amatike 1.500 akaba iyanga, ariko bikaza kurangira bashyize hanze andi arenga 2.500 ndetse ko n’abakurikiye iki gitaramo bari hanze y’u Rwanda.

Cyogere yateguje ikindi gitaramo kirenze icyo abantu babonye, agaragaza ko undi mwaka hazaba iserukiramuco.

Ati “Umwaka utaha ntabwo twifuza iki gitaramo turifuza iserukiramuco. Ni yo mpamvu ntashobora gutegereza umwaka utaha, ngiye gushaka ibintu byiza cyane hagati bitegura iserukiramuco. Ndi kubitegurana imbaraga, ibi byiza mwabonye tubizengurutse u Rwanda rwose.”

Yavuze ko abantu bagiye kujya batungurwa n’Ishyaka ry’intore n’ubwo bari basanzwe babazi.

Ati “Natangiye mbashimira byabaye ibintu byiza birenze ibyo nakekaga ariko nababwiye ngo ni ubwa mbere mutwumvise, ariko si ubwa mbere mutubonye.”

“Ngira ngo hari icyo byabafashije kuba atari ubwa mbere batubonye ariko na none twatunguwe no kubona ari ubwa mbere mutwumvise mukatwitabira gutya, mutweretse ko namwe muri ‘Indirirarugamba’ koko. Twatabaranye.”

Muri iki gitaramo hagaragayemo abasirikare barwanye urugamba rwo kubohora u Rwanda. Ikindi, Kate Bashabe usanzwe uzwi cyane ku mbuga nkoranyambaga yatunguranye ahamiriza muri iki gitaramo.

Itorero ‘Ishyaka ry’Intore’ ryerekanye imikino itandukanye yo hambere

Ni igitaramo cyo muri Mutarama cyatumye benshi bataramana ibyishimo

Abana bahawe ikaze mu itorero ‘Ishyaka ry’Intore’

Ni igitaramo cyo muri Mutarama cyatumye benshi bataramana ibyishimo

Kate Bashabe wambaye umukenyero akurikiye igitaramo

Ruti Joel ni umwe mu bagize iri torero

Kate Bashabe ni umwe mu bigaragaje muri iki gitaramo

Itorero ‘Ishyaka ry’Intore’ ryashimishije abantu ubwo baririmbishaga umwirongi

Itorero ‘Ishyaka ry’Intore’ nubwo bataramara igihe kinini ariko bamaze kwigarurira imitima ya benshi

Ruti Joel ni umwe mu bigaragaje muri iki gitaramo cyane ko asanzwe akunzwe mu muziki gakondo

Itorero ‘Ishyaka ry’Intore’ ni ubwa mbere ryari rikoze igitaramo

Itorero ‘Ishyaka ry’Intore’ ryagaragaje ubuhanga

Itorero ‘Ishyaka ry’Intore’ bakinnye umukino ugaragaza kugambanirwa k'Umwami ugera aho akabimenya

Ruti Joel asimbuka urukiramende

Ikigitaramo cyari cyuje uburyohe

Itorero ‘Ishyaka ry’Intore’ bagaragaje ko umuziki gakondo ukunzwe

Iki gitaramo cyari kinogeye ijisho

Iki gitaramo cyari cyahawe umwanya uhagije ndetse buri wese wagiye ku rubyiniro yari yiteguye

Iki gitaramo cyari gitegerejwe na benshi bakunda gakondo

Iki gitaramo cyitabiriwe ku bwinshi

Alain Numa ni umwe mu bari bitabiriye iki gitaramo

Abasirikare bagiriye ubumuga ku rugamba rwo kubohora Igihugu bari bitabiriye

Akanyamuneza kari kose ku bitabiriye iki gitaramo

Abarimo Muyoboke Alex (iburyo) n'umuhanzi Igor Mabano uri hagati bari bitabiriye

Abahanzi Mariya Yohana na Muyango ni bamwe mu bitabiriye

Abantu bari bahimbawe

Ushaka kureba andi mafoto wakanda hano: https://www.flickr.com/photos/igihepictures/albums/72177720323395255/

Amafoto: Kwizera Remy Moses